USA ka 81 anyos nga biyudo ang naapil sa pagkasunog sa iyang panimalay sa Barangay Bato, lungsod sa Badian, Dominggo, Pebrero 14, alas 6:15 sa buntag.
Si Cesario Emperado, 81, ug biyudo, ang natanggong sa balay atol sa pag-ulbo sa sunog.
Si Police Staff Sgt. Jeffrey Badilles sa Badian Police Station nga nahinabi sa Superbalita Cebu, nagkanayon nga nag-inusara nalang ang biktima sa iyang panimalay.
Sa pag-abot sa mga bombero ug kapulisan, naugdaw na ang panimalay lakip ang biktima.
Si SFO1 Jessie Diana, chief operation officer sa Bureau of Fire Protection (BFP) sa Badian, niasoy sa Superbalita Cebu nga nigawas sa ilang imbestigasyon nga iring maoy hinungdan sa sunog.
Matod ni Diana, ang biktima nag-inusara na lang sa iyang pagpuyo.
Ang kabanay sa biktima nibutyag nga magsuga kini og lampara nga anha ibutang sa lamesa samtang matulog.
Tungod niini, dason ni Diana, ang lampara posibleng natumba tungod sa iring ug wala nakabantay ang biktima nga nahinanok sa iyang pagkatulog.
Matod pa, daghang binuhi nga iring ang biktima.
“Tapad sa lamesa, gipatungan sa lampara, naa man daw didto daghang sinina sa namatay niya nga asawa, didto daling mikatap ang kayo,” dugang ni Diana sa Superbalita Cebu.
Gumikan kay light materials ang balay, paspas ang pagsilaob sa kayo ug naugdaw kini bisan atol sa sunog kusog ang uwan hinungdan nga wa usab dayon makamatikod ang mga silingan.
Ang biktima gikataho nga maglisod na usab kini og lakaw tungod sa iyang sakit nga diabetes.
Ang sunog giisa sa first alarm ug nakontrolar sa pagka alas 6:35 sa buntag sa samang adlaw. Ang danyos gibanabana nga P15 mil.