Barangay Lahug miestrikto og balik,mag-lockdown na matag Dominggo

MIESTRIKTO og balik ang Barangay Lahug, dakbayan sa Sugbo sa mga quarantine protocol tungod sa pagsaka sa kaso sa coronavirus disease 2019 (Covid-19) ug gipili lang ang mga establisemento nga makaabli sa Dominggo sugod kagahapon, Pebrero 14, 2021.

Kini ang ikaduhang barangay sa dakbayan nga nipatuman niini. Una mao ang Barangay Guadalupe niadtong Enero 24, 2021, nagsugod tungod sa susamang rason.

Ang makaabli lang ang mga gasolinahan, botika, ug money remittance centers matag Dominggo, samtang sirado og apil ang grocery stores, ug di mahimong modawat og dine-in services ang restaurants.

Si Lahug Barangay Captain Hazel Ann Empleo niingon nga abli lang ang mga kan-anan alang sa delivery ug pick-up services. Matod ni Empleo, sukad pa niadtong Enero, gipahibawo na ang mga residente sa mao nga lakang sa barangay aron makapangandam sab sila sa mga kabag-ohan.

Sukad niadtong Enero, nag-istrikto na sila og balik sa curfew, stay-at-home order, paggamit og quarantine pass gikan sa City Hall, ug ang ginadili nga tapok-tapok, apan matod ni Empleo, karong pa’ng Pebrero nila giimplementar ang pag-apil sa mga establisemento.

Sumala ni Empleo nga kapin sa duha ka semana sa wala pa nila giimplementar, gipahibawo na ang mga residente kalabot sa pagsirado sa grocery stores aron maka-adjust ang katawhan sa eskedyul sa ilang pagpangumpra sa dili pa mag Dominggo.

Nakahukom ang Lahug Barangay Council sa pag-apil sa grocery stores tungod kay daghan ang mangumpra matag Dominggo nga moresulta sa panagtapok na hinuon sud sa tindahan.

“Ang Sunday man gud, mao gyu’y daghan kaayo og tawo kay way trabaho, anha na sila magtapoktapok, kaonkaon, inom-inom,” matod ni Empleo.

Gidugang ni Empleo nga tungod sa pagsaka sa kaso sa Covid-19 sa barangay, nakahukom ang barangay council nga apilon na ang mga establisemento diin adto kasagaran magtapok ang mga tawo.

Si Empleo niingon wa sila nagtakda og kanus-a kutob nga Dominggo ning maong aksyon human magdepende kon moubos na ang kaso sa barangay ug sa dakbayan.

Ang mga residente, sigon ni Empleo, makagawas lang kon adunay importante nga tuyo sama sa pagtrabaho, pagpalit og tambal, ug pag-adto sa remittance centers. Kinahanglan adunay quarantine pass.

Si Konsehal Joel Garganera, deputy chief implementer sa Emergency Operations Center (EOC), miingon nga dunay gipang-deploy sa barangay nga mga police personnel.

Ang mga madakpan dal-on sa holding area sa Tejero gym.

Giklaro sad ni Empleo nga ang ilang gibuhat pagtuman sa executive orders sa mayor ug dili kini matawag nga granular lockdown.

Ang Barangay Lahug nakatala og 82 ka kaso sud sa miagi nga 14 ka adlaw. (JJL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph