Tukion sa pag-usab sa konseho sa Lungsod sa Minglanilla karong adlawa ang mga lagda subay sa pagpatuman sa mas hugot nga rekisitos sa paggamit og quarantine pass sa lungsod.
Kini maoy gipahibalo ni Minglanilla Mayor Elanito Peña kagahapon, Pebrero 15.
“Amo nang tukion sa session unya amo sad na tan-awon kay naa may EO ana si Gov. Gwen kay MGCQ (modified general community quarantine) naman. Ang ato man gud ani kay nanalipod sad ta kay naa lagi ning Covid unya kana pa gyung Covid variant so mao na,” matod ni Peña.
Sukwahi kini sa unang pamahayag sa lokal nga kagamhanan sa miaging semana.
Usa sa katuyoan niini aron ma limitahan ang pag gawas sa mga tawo sa pampublikong lugar.
Subay sa gipahibalo sa kapulisan sa Minglanilla, matag panimalay gihatagan lang og tagsa ka quarantine pass nga may lain lain nga kolor aron dali nga masuta ang mga barangay nga gitugotan lang sa pag awas.
Matag Lunes, Miyerkules ug Biyernes, makagawas lang ang mga residente nga nag hupot og quarantine pass nga may kolor nga green.
Samtang sa Martes, Huwebes ug Sabado alang lang usab sa mga residente nga may yellow nga quarantine pass.
Alang sa mga residente nga nag trabaho ug nalakip sa unang gitugutan sa pag gawas, kinahanglan lang mag dala og workers pass o company ID.
Pasabot nga kon wala niining naasoy nga mga dokumento dili pwede mo gawas ug kinahanglan nga mag stay at home lang una.
Gawas lang kon adunay emerhensya sama sa pagpa check-up, magpa admit ug mo palit ug tambal.
Matod ni Peña nga kinahanglan nga tukion kini pag-usab aron mahisubay kini sa kasamtangan nga quarantine status sa lungsod.
Ang lungsod sa Minglanilla gipaubos na kini sa modified general community quarantine (MGCQ), ubos sa maong status mas luag na ang paglihok sa mga residente sa usa ka lugar.
“Naay kausaban murag i-review sa to nako og balik. Kana sa scheduling nila kanang inig gawas sa barangay ug sa establishment possible ang establishment na ang mo determine kay naa may mga kolor na,” matod ni Peña.
Subay sa uwahing tala sa lungsod niabot na sa 91 ang aktibong kaso niini.
Bisan paman niini, nanawagan si Peña sa mga konstituente nga mo subay sa striktong protocol aron mapugngan ang pagsaka sa mga kaso sa Covid-19. (ANV)