NGANONG gitawag nga rescue operation sa mga batang Lumad ang pag-adto sa kapulisan ug mga opisyal sa Department of Social Welfare and Development (DSWD) sa retreat house sa USC-TC?
Nganong naapil na man hinuon sa red tagging? Nianhi sila sa Sugbo sa miaging tuig aron moreklamo kabahin sa pag-harass sa ilang tunghaan didto sa Mindanao. Apan kay naabtan sila sa quarantine pag-Marso, natanggong intawon sila dinhi.
Apan, lahi man ang timpla sa atong mga tinugyanan sa balaod. Wa ba kaha kining kapulisan nangita rag justification aron magasto ang dakong budget alang sa red-tagging?
Dayon, naay mga trolls nga nagsigi og pasangil nga sila gidala diha sa mga NPA. Alang kanako man gud, kon NPA pa, nganong moanhi man sa Syudad gikan sa Mindanao? Nganong di na lang sila mosaka sa bukid?
Nagtuo kining mga nagpaluyo sa trolls nga mailad ra nila ang netizens ug mahadlok mosaway kay ila ra man sab nga i-red tag. Kuyaw baya kining ma-red tag. Kon dili ka dakpon, mabiktima ka sa riding in tandem.
MASAKITON
Nganong moinsister man si Mayor Edgar Labella nga mag-online nga press conference karong nanghupong ug nanglagom pa ang iyang nawong? Di man gud katuohan nga igo lang siyang nag-antibiotic tungod sa ear infection.
Di ko motuo nga walay nakatambag kang Labella nga makadaot kaniya nga makit-an nga ingon niana ang kahimtang. Kon ang tuyo mao ang pagpakita nga siya gyud ang nagdumala sa City Hall, naa may laing mga paagi nga di kinahanglang makit-an siya.
Alang kanako hinuon, labing maayo nga mag-sick leave lang gyud siya ug i-appoint si Bise Mayor Mike Rama isip acting mayor. Ngano man diay kon gusto si Rama magpapili unya nga mayor sa 2022? Mahimo mang bawi-on ni Labella ang pagka-acting inig ka alim na sa iyang sakit.
Basta alang kanako, di maayo alang kang Mayor Labella nga masakiton tan-awn sa iyang mga press conference kada adlaw. Di ra ba mga reporter ra, nga di mangutana kaniya kon kumusta ang iyang panglawas, ang makakita kaniya. Ang tibuok siyudad gyud. DM sa @anol_cebu