Ablihan na ang mga sinehan? Usa sa mga isyu karon nga gihisgotan samtang nagsige pa og saka ang kaso sa nataptan sa Covid-19 mao ang plano sa kagamhanan nga ablihan na ang mga sinehan subay sa ilang pagtuon nga makatabang ni sa ekonomiya sa nasud, nga naapektohan og maayo sa Covid-19. Ang sinehan maoy usa sa mga establisemento nga una nga nanira sa pagsugod sa kwarentinas sa tibuok nasud.
Dihang gipaubos sa modified general community quarantine (MGCQ), gitugtan ang mga simbahan nga mangabli apan kutob ra sa katunga sa kapasidad ang makasulod. Ang kadaghanan sa mga simbahan abli, di sama sa mga sinehan nga sirado ug air-conditioned pa, usa sa hinungdan nga dunay pagbabag nga ablihan.
Ang sinehan usa ka negosyo. Sa ato pa, walay negusyante nga magpaalkanse. Bisan og atong sabton nga wala nay mobabag nga ablihan ang mga sinehan, apan mosugot ba ang mga nagdumala sa sinehan nga 30 o 50 porsento ra sa kapasidad sa sinehan ang mahimo nga makasulod? Morag di mosugot ang mga tag-iya nga katunga ra ang makasulod kay dakong alkanse sa negosyo.
Ang kadtong mga tawo nga gusto mosimba sa adlaw nga tigsimba basi sa ilang tinuhoan, nagtuo ko nga moreklamo nga tugtan ang mga sinehan nga ablihan ug pasudlan og 75 porsento sa tawo sa iyang kapasidad samtang ang mga simbahan gidid-an, nga daghan ang makasulod sa adlaw nga tingsimba. Ang sinehan kalingawan lang samtang ang pagsimba hingpit nga pagtuo sa usa ka tawo alang sa iyang spirituwal nga kaluwasan.
Niadtong Dominggo, Pebrero 14, ang bulletin sa Department of Health (DOH-7) nagtala og 218 nga bag-o nga kaso sa Covid-19 sa Dakbayan sa Sugbo. Si Presidential Assistant Mike Dino miangkon kagahapon nga positibo siya sa Covid-19 ug iyang gihangyo ang iyang nahimamat nga magpatesting.
Ang Dakbayan sa Lapu-Lapu dunay 67 ka bag-o nga kaso samtang dunay 61 sa Dakbayan sa Mandaue. Misaka na sa 2,993 nga aktibo nga kaso sa Dakbayan sa Sugbo, samtang 602 sa Mandaue, ug 444 sa Lapu-Lapu. Ang Brgy. Guadalupe nag-lockdown matag Dominggo tungod sa kadaghan na sa mga kaso sa Covid-19 ug aron maka-disinfect ang mga establisemento.
Ang Brgy. Lahug estrikto nga nipatuman sa kwarentinas. Gipasirad-an ang mga establisemento, gawas sa supermarket o tiyangge, matag Dominggo kay mao ni adlaw nga ang kadaghanan sa tawo manglakaw ug mokaon sa gawas, matud pa ni Kap. Hazel Ann Empleo. Abli ra ang mga restawran apan gidili ang pagkaon sa sulod. Ang Lahug dunay 82 nga aktibo nga kaso sa Covid-19 karon.
Sa lain bahin, ang Brgy. Labangon dunay 93 na nga kaso sa Covid-19; ang Brgy. Tisa, 87; ug ang Brgy. Talamban 65. Angay unta nga mosunod ning Brgy. Labangon, Tisa, ug Talamban sa gibuhat sa Brgy. Lahug nga estrikto nga gipatuman ang mga lagda sa executive order sa mayor kabahin sa health protocol aron di na modaghan pa ang mga kaso sa Covid-19.