BISAN pa sa gihimo sa Philippine National Police (PNP) nga public relations (PR) aron kunuhay maduol sila sa katawhan ug mausab ang ilang imahen sa mga mata sa publiko, apan di gihapon mosaler gumikan sa daghan kaayong mga abuso nga gihimo sa ilang pipila ka iresponsableng mga sakop. Hinuon, dili baya pod ang tanan nagbinoang. Apan dili man god nato kalikayan nga mohusgar o mo-conclude dayon ang publiko sa tibuok organisasyon kon aduna lay usa nga makahimo og binoang.
Sama sa nahitabo sa usa kargador nga gidakop sa mga pulis sa Carbon Police Station (Station 5) gumikan kay wala mag-mask kay violation sa quarantine rule. Apan gumikan kay wala makabayad sa multa, unsa bang pagka-unsaa nga gibunalan o gi-paddle man sa usa ka pulis. Morag misulod og fraternity ang biktima nga giila nga si Reiglo Briones. Ambot unsay nasulod sa utok sa pulis nga iya man kadtong gihimo sa pobreng kargador. Maayo unta og kriminal tong tawhana. Hinuon, gi-imbestigahan na kini sa kadagkuan sa kapulisan.
Ang bantugang nobelista ug “most widely read” Chilean author nga si Isabel Allende miingon: “Nalisang ako sa pag-abusar sa gahum ug ang gahum sa pag-abusar. Apan ang labi nakong gikahadlukan mao ang gahum sa impunity.” Unsa bay kahulugan nianang pulong nga impunity?
Kana nagpasabot og pagbatyag nga gawasnon ka o di ka patubagon sa mga dautang linugdangan sa imong binuhatan. Ug subo kaayo nga mao kanay gibati sa mga Filipino karon ngadto sa atong kapulisan nga ang mga pulis nahimo nang walay gikahadlukan sa pagpanubag sa ilang kasaypanan. Ug nga way balaod nga makagukod kanila bisan unsa pa ka-kuwestiyonable sa ilang mga binuhatan.
Kon kaniadto nabaniog ug pagya ang pulong nga “hayahay pas pulis,” karon dili lang kay hayahay, sobra pa sa hayahay gumikan kay anaa nila ang tumang kahayahay. Anaa pa ang pagkahawod nga way bisan kinsa kanatong mga magbubuhis ang may katungod nga mokuwestiyon ug mopatubag kanila bisan pa sa katulibagbag sa ilang pagsabot sa ilang motto nga mao ang “to serve and protect” ngadto na sa pag-abusar ug pagpanglupig ug pagyatak sa tawhanong katungod.