KAY nag-inusara lang ko dinhi sa atong siyudad sa Davao sanglit tua man sa among probinsiya ang akong pamilya, nanghimantay lang ko sa mga hitabo sa Valentine's Day.
Isip mamahayag, akong gisundan niadtong Sabado hangtud Dominggo ang balita labot sa tulo ka mga nagpositibo sa Covid-19 variant dinhi sa Davao Region.
Usa sa akong gibantayan ang Covid-19 Davao Region Updates nga group chat. Didto nako nabasa ang mga pangutana sa atong mga kauban sa buhat sa mantalaan, radyo ug telebisyon ngadto sa mga opisyales sa Department of Health (DOH) Region 11.
Nag-asu-aso sa kapungot ang mga sakop sa media tungod kay wa mitubag ang tigpamaba sa DOH nga naa sab sa maong group chat.
Buot lang mahibalo ang media sa mga impormasyon sama sa case profile, pila ka mga samples ang napadala sa Philippine Genome Center, pila ka mga samples ang gikan sa Davao City, kanus-a ang mga pasyente nagpositibo, pila ka mga tawo ang nakaduol kanila, ug unsay gihimo karon sa ahensiya. Ug nganong lisud man kini nga tubagon?
Naabtan na lang og Valentine's Day wa gyuy tubag ang DOH mao nga nagyawyaw ang tanan. Dugay na kini nga problema. Busa, nanawagan kita nga hatagan kini og solusyon sa kadagkoang opisyal ug mas maayo nga duna silay Communication Plan.
Teenage pregnancy
Sa pagsaulog sa Valentine's Day, daghan ang akong nakita nga mga batan-ong babaye ug lalaki nga nag-post sa social media.
Sa ilang mga posts, nakaseguro ako nga nadugangan ang ihap sa mga kabataan nga mamabdos tungod kay nadala sa ilang nag-uros-uros nga pagbati.
Sila unya ang madugang sa repot sa Commission on Population and Development labot sa 10 anyos ngadto 14 anyos nga nagbuntis. Sa report, misaka ang ihap ngadto sa 7 porsiyento sa tuig 2019 kumpara sa milabay nga tuig. Busa, kinahanglan nato dinhi ang maayong solusyon sa maong suliran.
Usa sa nihatag og solusyon mao si Senator Win Gatchalian kinsa naalarma sa pagsaka sa suliran sa pagbuntis sa mga menor de edad. Si Gatchalian nanawagan sa mas agresibong tubag sa gobyerno aron mapugngan ang pagbuntis sa kabataan.
Alang ni Gatchalian, ang pagpugong sa pagsaka sa pagbuntis sa mga kabataan nagkinahanglan og edukasyon nga ihatud panaagi sa mga tunghaan ug barangay.
Tungod niini, ang magbabalaod niduso sa Senate Bill No. 1985 nga nagtinguha sa pag-institusyonalisa ug pag-establisar sa Parent Effectiveness Service Program sa matag siyudad ug munisipyo sa nasud.
Ang programa nagtinguha sa pagtabang sa mga ginikanan sa pagpalambo sa ilang kahibalo aron maghatag og de kalidad nga pag-atiman alang sa kaayohan sa ilang mga anak.