ADUNAY bag-ong idalit ang Nestle Philippines alang sa mga batan-on ug estudyante nga mahiligon sa paugnat sa kusog pinaagi sa ilang programa nga Milo Champion Habit.
Ang maong programa pwedeng sundon sa mga estudyante bisan anaa sila sa ilang balay kay tungod makita man kini sa social media platform sa Milo.
Mismo ang Olympian nga si Mary Joy Tabal, usa sa mga ambassador sa programa, ang nagtinguha sa pagtudlo sa mga batan-on sa basic exercises aron sila magpabiling healthy og mahilayo sa sakit.
Pasabot ni Tabal atol sa Zoom press conference kagahapon, nga dako ang nausab tungod sa pandemiya apan di kini magpasabot nga mawagtang na ang pag-exercise kay aduna may pamaagi nga mabuhat kini.
Aron mahatagan og option ang mga bata, gilusad dayon sa Milo Philippines ang program nga Milo Champion Habit diin pwede silang mosunod sa mga simple exercise nga makita sa Youtube ug Facebook.
“Dako ni nga matabang sa pag-guide sa mga bata. Kini nga exercises basic lang og pwede masunod og mabuhat bisan sulod sa balay,” pasabot sa 2017 Southeast Asian (SEA) Games gold medalist.
Anaa sa virtual press conference mao ang staffs sa Milo nga gipangulohan ni Milo Sports Executive Luigi Pumaren, DepEd-7 Regional Director Dr. Salustiano Jimenez ug mga miyembro sa sports media sa Sugbo.
Matod ni Jimenez nga suportado sa DepEd ang maong programa ug ila kining ipa-ambit sa mga bata pinaagi sa mga Physical Education (PE) teachers.Ang PE teachers mao na ang mogiya sa mga bata sa exercises.
Dugang ni Jimenez nga pwede nila ma monitor ang mga bata pinaagi sa pag-record sa ilang regular output pinaagi sa video recording.
“Kining exercise dako ni og matabang sa academic performance sa mga bata. Maong importante gyud nga malambigit sili og mga activities nga ingon ani,” padayag ni Jimenez.
Si Tabal midugang nga basi sa iyang nakita, daghan ang mga bata nga sige na lang og duwa’g online games.
Matod niya nga ang maong exercise routine makatabang aron maminusan ang ilang oras sa mobile games.
Sa iyang bahin, si Pumaren nagkanayon nga ang tuyo sa maong programa mao ang pagtudlo sa mga bata og healthy habit kay mao man kini ang sinugdanan kon sila gusto mosulod og sports.
Dugang niya nga ang dako’g matabang kanila ang DepEd-7 sa pagdala sa ilang programa ngadto sa mga bata labi na kadtong wala or hinay gyud ang internet connections.
Ang mga exercise nga gibuhat sa Milo Champion Habit pwedeng makita sa social media pages sa Nestle Philippines. /