Wala tuyoa nga nakadungog ko sa estoryahanay sa duha ka mga mayor dili pa lang dugay.
Ang usa (Mayor A) mahimo pa nga modagan sa piniliay sa 2022 pero ang ikaduha (Mayor B) di na pwede nga modagan kay last-termer na.
Samtang nagkaon og paniudto, mihangyo og suporta si Mayor B kang Mayor A.
Wala pa gani makatiwas og sulti, diretso dayon siya nga gitubag ni Mayor A.
Kon nagplano ka nga modagan pagka-kongresman, ayaw lang usa.
Kon nagplano pod ka nga modagan pagka-board member, ayaw lang sab pod. Maglisod mi og suporta nimo kay naka-commit na mi.
Igo lang intawon mipahiyom og hilaw si Mayor B.
* * *
Kini si Mayor B nangindahay nga mag-kongresman kay matod pa niya hiusahon niya ang nagkaguliyang nga mga lider sa probinsiya.
Dili pa lang dugay, misulti siya nga bisan kusog ang iyang kaatbang, masaligon gihapon siya kay kusog man sab siya.
Daghan ang natingala kon nganong nakahunahuna si Mayor B nga modagan pagka-kongresista nga mahimo ra man unta og pagka-bokal lang ang iyang daganan.
Tinuod nga lig-on ang kasamtangan nga kongresista sa distrito unya daghan pod og kwarta. Buot ipasabot, andam sa bisan unsang gubat ang maong kongresista.
Dihay mihunghong nako sa hinungdan nga nakahunahuna si Mayor B nga magkongresman na lang.
Matod pa, tugbangan kuno sa gobernador ang iyang kuwarta nga giandam para sa kampanya. Kon makapangita siya og P50 milyones, andam kuno ang gobernador nga mohatag pod sa kantidad nga P50 milyones isip tabang sa kampanya ni Mayor B.
Susmariosep.
Nag-awas awas man ang hinambog ani oi.
* * *
Usa lang kini sa mga istorbot (istoryang binutbot o way klaro) nga akong nadungog.
Laing mayor ang nagsulti nga gipatawag silang mga mayor sa maong gobernador.
Gusto sa gobernador nga ang kasamtangan nga mga mayor molansad ubos sa iyang grupo. Kon dili, misulti ang gobernador nga palansaran sila og kaatbang unya mohatag ang gobernador sa pikas og dili mominos sa P30 milyones.
Ang ubang mga mayor mitamihid lang.
Pero ang uban, labi na kadtong mga batan-on, naglibog sa ilang buhaton.
Tinuod ba kaha ang gisulti sa gobernador?
Maayo gani kay abtik ang usa nga mayor.
Matod pa niya, unsaon pagka-tinuod sa gisulti sa gobernador nga ang among lungsod wala man gani makaabot og 2,000 ang mobotar.
Katuhoan lang ang gisulti sa gobernador kon dako pa ang iyang lungsod unya daghan sab og botante. Pero sa kagamay sa mga botante sa iyang lungsod, dakong binuang kon mohatag og 30 milyones ang gobernador.
* * *
Naguol ang usa kongresista. Ngano man?
Gisultian siya sa iyang mga amigo nga kon magpadayon ang gobernador nga maoy mangulo sa kapitolyo sa sunod piniliay, mang-resign na lang ang mga department heads.