Late nga Valentine’s Day date naputol kay gidaro ang manag-uyab sa multi-cab nga gimaniho sa barangay tanod nga nakatulog samtang nagmaneho sa Lunes sa gabii, Pebrero 15, 2021 sa Purok Gumamela, Barangay Daan Lungsod, Tuburan.
Nabulabog ang date sa manag-uyab nga sila Lloyd Lopez, 21, ug Mary Ann Tablero, 19, taga Mangga. Ang duha nangalandig sa tambalanan. Nabilanggo sa Tuburan Police Station si Ernido Pajanas, 46, minyo, taga Purok Tambis, Barangay Apalan sa mao nga lungsod. Nadaut usab human gidaro ang koral sa balay ni Pacito Bucog, 59, ug motorsiklo ni Rolando Dungog.
Si Police Staff Sgt. Mark Joseph Toring, sa Tuburan Police Station nga nahinabi sa Superbalita Cebu nagkanayon nga si Pajanas dunay gikuha sa Barangay Apalan, apan nakatulog sa iyang Suzuki multicab samtang nagmaneho. (GPL)