MAAYONG adlaw sa tanan. Nakasaad ra ba ko niadtong atong lindog sa milabay nga Huwebes nga atong ipadayon ang paghisgot kalabot sa Pacquiao-Garcia sa 2022. Ato sa ipaulahi kini nga topiko tungod naintriga ko og dako sa nahitabo nga sunog didto sa Laverna, Buhangin niadtong milabay nga buntag diin upat ka kinabuhi ang nakalas sa naugdaw nga balay.
Nakuha ang akong pagtagad sa post sa DXDC, RMN Davao nga usa ka Biblya ang nakuha gikan sa abo ug mga salin sa sunog nga igo rang nasunog ang mga kilid apan nagpabilin nga hitsas ang sulod.
Nabanhaw sa akong hunahuna ang gisulti ni San Pablo sa basahon sa Hebreohanon 4:12 nga nagkanayon nga "Kay ang pulong sa Diyos buhi, labi pang mahait kaysa bisan unsang espada nga duha ang sulab..."
Tingali, alang sa uban, milagro ang wala pagkaugdaw sa maong basahon.
Upat ka mga batan-on ang naapil sa sunog ug nakabsan sa ilang kinabuhi apan ang Bibliya gipanalipdan nga dili maugdaw aron modala og mensahe sa katawhan labi na sa mga wala nagahatag og pagtagad sa pulong sa Diyos.
Kahibulongan ang panghitabo apan dunay paagi ang Diyos pagpreserba sa iyang balaan nga pulong.
Sa paggahum sa Empiryo sa Roma gipangsunog sab ang mga Bibliya uban sa paglutos sa mga midawat sa pagtulon-an ni Kristo ug nagtuman sa kasugoan.
Tungod sa pagtamod sa mga Kristohanon ug pagkabililhon sa Bibliya alang kanila, daghang sugilanon giunsa sa uban pagtago ang Bibliya sa ilang balay aron dili makita sa mga sundalo sa Roma ug kuhaon gikan kanila kay hingpit nga gidili sa katawhan ang paghupot og Bibliya sa ilang kinabuhi niadtong panahona.
Gidid-an sa kaparian ang katawhan sa pagbasa sa Bibliya sa dugay nga panahon uban sa mahadlukon nga pasidaan nga makabuang ang pagbasa sa Bibliya!
Makabuang ba ang pagbasa sa Bibliya?
Si Martin Luther, naaghat pagsulat batok sa pagtulon-an sa Roman Catholic dihang iyang gibasa ang gikadinahan nga Bibliya sa mga pari. Nagsugod pagsumpaki sa iyang pagsabot ang kalahian sa ginatudlo sa kaparian sa nasulat sa Bibliya. Usa niini ang doktrina sa kaluwasan nga maangkon sa tawo pinaagi sa mga buhat, pag-ampo alang sa mga nangamatay ug ang iyang nabasa nga maluwas ang tawo pinaagi sa pagtoo.
Kini nga mga panguta naghatud kaniya nga mobiya sa Roman Catholic Church diin mahimo unta siyang usa ka pari ug dinhi nahimo siyang amahan sa pundok Protestant.
Dako ang gikatampo sa Roman Catholic sa pagkamugna sa Bibliya apan makasusubo lang kay ang mga pundasyon sa ilang pagtoo gipasikad sa tradisyon nga ang kasagaran sukwahi sa nasulat sa Bibliya.
Karon, nagkadaiya nga bersiyon sa Bible ang atong makita apan daw walay panahon ang katawhan sa pagbasa niini. Mas dako ang panahon sa katawhan, labi na ang mga batan-on sa pag-atubang sa cellphone, mag-facebook kay sa pagbasa sa Bibliya. Ang uban gihimong basahon ang Bibliya aron makatulog kay dali ra kuno ka makatulog kon magbasa og Bibliya. Ngano man?
Hinayhinayon sa paghapyod sa yawa ang imong mga mata aron mopiyong kay dili siya gusto nga makabasa ka sa pulong sa Diyos ug motuman kaniya tungod kaaway sa yawa ang Diyos!
Dili gusto sa yawa nga maluwas ka kay kon mahibalo ka sa kabubut-on sa Diyos, kaluwasan ang imong padulngan.
Gusto siya daghan ang iyang ikauban didto sa impiyerno sa adlaw sa paghukom.
Akong sublion higala, "Ang pulong sa Diyos buhi". Bisan unsa man ang atong tinuohan, makigdugtong ta sa Diyos pinaagi sa pagbasa sa iyang pulong, ang Bibliya. Ang iyang pulong kahayag. Magalamdag sa atong agianan alang sa hustong pagkinabuhi atubangan sa Diyos ug sa kagamhanan sa kalibutan.
Ang pagbasa sa pulong sa Diyos magahimo kanato nga bulahan labi na kon kita motuman sa iyang kabubut-on.