KIDAPAWAN CITY - Natibway ang kinabuhi sa usa ka negusyante tungod lang sa kanding nga nitabok sa dalan alas 4 sa hapon Martes, Pebrero 16, 2021.
Giingon nga ang biktima nga si Rolando Galope, 58, minyo, ug molupyo sa Barangay Malatab, Antipas, North Cotabato, negusyante og bulad.
Sa taho gikan sa Matalam Municipal Police Station, nasayran nga sakay ang biktima sa iyang motorsiklo gikan sa Kidapawan City nga nangompra og bulad aron nga iya sab nga itumod sa Antipas.
Apan pag-abot ni Galope sa Barangay Sta. Maria sa maong lungsod, kalit nga dunay mitabok nga dakong kanding sa national highway.
Gisulayan pa unta og lihay ni Galope ang kanding, apan tungod sa kalit nga pagtabok niini, naabtan gyud niya kini.
Wala na, matud pa, makontrolar ni Galope ang motor tungod sa kusog sa impak sa hitabo hinungdan nga nabalintong siya ug nangapasad ang iyang dalang mga bulad sa highway.
Nadala pa ang biktima ngadto sa Midway Hospital sa Matalam ug wa madugay, gibalhin na sab ngadto sa Cotabato Regional and Medical Center (CRMC) sa Cotabato City apan gideklara siyang dead on arrival human makaangkon og mga bali, pangos, ug pagkabunal sa ulo niini sa sementadong dalan.
Nasayran nga ang kanding nga naligsan sa biktima napiang lang.
Tungod sa disgrasya, nagpasidaan ang mga awtoridad sa mga tag-iya og kahayopan nga kung manugway sa ilang mga binuhi himuon kini layo sa kalsada o kaha ikulong na lang.