Duha sa mga dagkong balita nga sagad pistahan sa entertainment mao ang pagpakasal sa mga sikat nga celebrity ug ang showbiz break-ups.
Sa Hollywood dunay mga gikasal nga wa gani abti og pila ka adlaw nagbuwag ra dayon sama sa pop star nga si Britney Spears nga nilanat ra og 55 ka oras ang kaminyuon.
Apan nasayod ba mo nga daghan sad sa showbiz ang wala makasal ug nagpabiling single bisan kon edaran na sa rason nga sila ra ang nasayod?
Ingon pa sa usa ka psychologist nga tungod kay abnormal ang kinabuhi sa showbiz. Dako sila og balay, daghan sila og kuwarta, apan dako sad sila og problema tungod kay kanunay nakabantay ang publiko sa ilang mga lihok labi na karon sa digital age.
Lahi sad ang kultura sa showbiz ug di kalikayan nga mas taas ang ilang ego tungod kay naanad sila sa high-profile nga lifestyle diin sila ang bida.
Sa mga local celebrity nag-una sa atong listahan nga wala sukad makasal sa edad nga 44 ang showbiz heartthrob nga si PIOLO PASCUAL. Ang depensa ni Piolo kon nganong single pa siya: “I just feel it will only happen in God’s perfect timing.”
Silang COCO MARTIN ug DENNIS TRILLO parehong mag-40 anyos na karong tuiga apan wala ta kadungog nga naghisgot sila og kaminyuon sa ilang mga partner.
Samtang sa kadaghang babaye nga nakarelasyon ni JOHN LLOYD CRUZ, 37, wa sad gyud ni magpahigot sa salag sa kaminyuon.
Mao usab silang KEMPEE DE LEON, 48; PAOLO BEDIONES, 46; MO TWISTER, 43; CARLOS AGASSI, 41; ug ex-mayor HERBERT BAUTISTA, 52.
Sa music industry, lakip sa mga nagpabiling single mao ang rock star nga si RICO BLANCO, 47; KRIS LAWRENCE, 38; JED MADELA, 43; ug ang rapper nga apl.de.ap, 46.
Sa mga babayeng artista nag-una sa atong listahan silang VINA MORALES, 42, ug JACLYN JOSE, 56.
Si Vina nitug-an niadto sa interbyu sa kaulohan nga dako pang minyo ang amahan sa iyang anak dihang sila pa ni Cedric Lee hinungdan nga wa sila makasal. Mao usab si Jaclyn Jose dihang sila pa ni anhing Mark Gil, ang amahan sa iyang anak nga si Andi Eigenmann.
Apan bisan kon duna nay mga anak wala sad kasuway mopaso sa simbahan aron moingon og “I do” silang AUBREY MILES, 40; PHOEMELA BARANDA, 40; ETHEL BOOBA, 44; MYLENE DIZON, 44; ug GRETCHEN BARRETTO, 50.
Engaged man tuod karon sa ilang mga boyfriend silang ARA MINA, 41; LIZ UY, 39; DIONNE MONSANTO, 35, ug ANGEL LOCSIN, 3, apan una pa lang ning higayon nga mopaso sila sa altar sa kaminyuon kon madayon man.
Kuntento ra pud ang mga komedyante nga silang KAKAI BAUTISTA, 42; K BROSAS, 45; GLADYS GUEVARRA, 43; ug CARMI MARTIN, 57, sa kinabuhing walay kabilinggan.
“I love love, but I’m scared,” kumpisal pa sa kanhi teen actress ANTOINETTE TAUS sa interbyu sa GMA kon nganong single pa siya sa edad nga 39. “The right time will come for me.”
Bisan ang mga pinakadako nga pangan sa media industry sama nilang JESSICA SOHO ug PINKY WEBB daw mas gipili ang magpakadalagang ulay.
Ang 56-anyos nga si Soho gihulagway sa Facebook account nga Kapuso Nation (dated Sept. 24 2020) nga, “Jessica is not married and does not have any children.”
Ang 50-anyos nga si Webb katapusang nakarelasyon niadtong 2009 si Edu Manzano. Apan sukad niadto wala nay balita sa iyang lovelife.
Sa Hollywood nag-una sa listahan ang 80-anyos ug legendary actor nga si AL PACINO nga wa makasal apan dunay tulo ka mga anak sa duha sa iyang mga kanhi nakarelasyon.
Gisundan ni OPRAH WINFREY nga nailang “richest African American of 20th century and North America’s first black multi-billionaire” apan walay anak sa edad nga 67.
Single pa sab si LEONARDO DE CAPRIO sa edad nga 46.
Apil sa mga Hollywood icon nga wa makasal base sa tvovermind.com mao silang DIANE KEATON, 75; OWEN WILSON, 52; TYRA BANKS, 47; SHERYL CROW, 59; HUGH GRANT, 60; WINONA RYDER, 49; BENICIO DEL TORO, 53; CHARLIZE THERON, 45; KYLIE MINOGUE, 52; ug JOHN CUSACK, 54.
Dihang gipangutana niadto si John Cusack kon nganong wa siya maminyo, ang iyang tubag: “Society doesn’t tell me what to do.”
Pung pa lagi sa mga katiguwangan: “Ang kaminyuon sama sa pagkaon matuk-an gyud ka kon di nimo usapon apan dili sad mahimong iluwa kon mapaso na ka.”