NITALIWAN na sa laing kalibotan si kanhi Cebu City councilor Sylvan “Jack the Wack” Jakosalem kagahapon, Pebrero 17, 2021.
Apan ang iyang nakulit nga ngan gikan pagkainilang disc jockey (DJ) ug brodkaster ngadto sa natad sa pulitika sa dakbayan nagpabiling buhi sa mga Sugbuanon.
Niadtong Pebrero 14, si Jakosalem kinsa nakasilbi og tulo ka termino isip konsehal sa siyudad sa 2001-2009, gidala sa tambalanan gumikan sa ataki, pneumonia ug urinary tract infection (UTI).
Apan wala na makaagwanta ang lawas ni Jakosalem sanglit niadtong tuig 2012, siya gioperahan gumikan sa neurocysticercosis ug sukad niadto, na bed-ridden si Jakosalem.
Naka-file pa sa iyang certificate of candidacy si Jakosalem para sa tuig 2013 nga eleksiyon dihang nisakit ang iyang ulo usa ka semana human sa iyang pagsang-at sa iyang kandidatura diin siya gihulipan sa iyang asawa nga si Sharon apan wala buligi sa katawhan human sa eleksyon.
Human niadto, si Jakosalem wala na makita sa publiko sanglit anaa ra siya kanunay sa ilang pinuy-anan samtang nagpaayo sa sakit.
Ang neurocysticercosis usa ka parasitic infection sa utok o central nervous system nga gikan sa pork tapeworm. Makakuha ang tawo ani human makakaon og undercooked pork, makainom og tubig nga nakontaminar sa tapeworm eggs, o gikan sa poor hygiene practices.
Si Jakosalem nga naila nga usa ka DJ sa Y101-Cebu dako og gikatampo nga naluwas ang kinabuhi sa usa ka empleyado sa kanhi Cebu City Zoo nga napaakan sa king Cobra sanglit siya ang istrumento sa pagkabaton og anti-venum gikan sa Camiguin.
“Jack served Cebu City as a city councilor and former CITOM chief, where he courageously advocated for solutions to traffic including opposing the controversial constriction of two flyovers. He was a passionate advocate for a more livable Cebu City,” matod ni Cebu City Vice Mayor Michael Rama.
“Jack the Wack signs off today. You will be missed, Jack. Our deepest sympathies and condolences to the Jakosalem Family, “ matod ni Rama.
“It’s really a very sad story. But where Jack is today, he is no longer suffering. And his family will no longer bare the endless agony,“ matod ni kanhi Cebu City mayor Tomas Osmeña.
Ang City Council atol sa regular session kagahapon nipasar og resolusyon ubos sa privilege speech ni Rama sa pagpaabot sa ilang hiniusa nga pahasubo ngadto sa nahabiling pamilya ni Jakosalem. (PAC)