AGI'G kamandoan sa administrasyong Duterte nga pakusgan pa ang pagsumpo sa ilegal nga sugal sa nasud, usa sa mga dakong coordinator sa ilegal nga "last two" digit game sa Barangay Magsaysay, Carmen, Davao del Norte ang nasikop sa National Bureau of Investigation (NBI) Davao Region alas 6:30 sa gabii, Pebrero 15, 2021.
Ang dinakpan mao si Bebing (bansagon gitago) hamtong ang pangedaron ug nasikop sab ang laing usa ka lalaki nga si Jerson nga maoy runner sa coordinator.
Ang poseur buyer sa NBI-Davao mitaya og last two ug dihang nagpositibo, gilayon silang gidakop diin nakuha sa ilang posisyon ang mga last two stubS, mga tally sheets ug pusta nga P1,550.
Nasayran nga gireklamo ang nahisgutan sa mga Small Town Lottery (STL) outlets sa pagpadagan niini og ilegal nga "last two" gumikan nagsubay kini sa resulta sa Philippine Charity Sweepstakes Office (PCSO).
Illegal ang pagkuha sa resulta sa nahisgutang suspek, maong gipailawom kini sa operasyon sa NBI-11 ug malampusong nasikop lakip na ang iyang runner.
Kasong kalapasan sa Republic Act 9287 kun Act to Increase Penalties Against Illegal Numbers Games ang ipasaka nga kaso batok sa mga dinakpan kinsa anaa karon gipangpaslak sa selda sa awtoridad. (Jeepy P. Compio)