Serna: Nora nominee sa pagka-National Artist

Nakasugat ko sa YouTube aning survey alang sa pagka-National Artist for Film & Broadcast Media ni Nora Aunor.

Niadto pang Disyembre 15, 2020 ang deadline sa nomination pero tungod kay kaduha na nakapasar sa deliberasyon ang superstar, automatic nominee na siya, matod pa ni Nick Lizaso, ang chairman sa National Commission for Culture & the Arts (NCCA).

Niadto pang panahon ni kanhi Presidente Benigno Aquino unang na-nominate si Nora pero may mga misinformation nga nakaabot kang PNoy mao nga nibabag kini.

Sukad sa 1971, nakadaug si Nora og ka-196 ka higayon gikan sa 255 ka nominations gikan sa national ug international levels.

Wa pay labot niini ang special awards nga hinatag sa private ug government agencies.

Sukad pa sa una niyang pagkalakip sa listahan sa mga nominado, daghan na ang nisuporta sa superstar.

Apil na niini ang mga dili Noranians pero nagmahal sa sining sa pag-arte ug pagkanta diin didto unang nadiskobrehan ang abilidad ni Nora.

Daghan usab ang nanghinaut (lakip na kining tagsulat) nga mahatag na ngadto sa una ug nag-inusarang superstar sa nasud ang award nga angay unta nga nadawat ni Nora Aunor kaniadto pa.

Kon programa sa udto na gani, sa It’s Showtime gyud ko masangit. Nindot man gud ang gitawag nga chemistry nila ni Vice Ganda, Vhong Navarro, Jhong Hilario, Amy Perez, Karylle, Kim Chiu, Jhugz ug Teddy ug Ryan Bang lakip na nila ni Ion Perez ug Ate Jackie.

Makalingaw usab ang mga segments labi na ang Name It To Win It nga makakutaw sa utok aron makatag-an sa pulong gikan sa mga hulagway nga gisumpaysumpay.

Lain nakong atngan mao ang Tagong Kampiyon. Niadtong Martes, si Franco Laurel ang celebrity singer nga gikuyogan nila ni Aljon Gutierrez ug lain pang “gradweyt” sa Tawag ng Tanghalan.

Nia na ta sa panahon sa kwaresma. Niadtong Miyerkules, gisaulog sa Simbahang Katoliko ang Ash Wednesday diin gipahinumduman ang katawhan nga sa madugay o madali, mobiya sa kalibutan ug mo-atubang sa Magbubuhat.

Niadtong naghinapos ang Enero, naospital ko sa Oslob District Hospital tungod sa hilanat nga balikbalik (salamat kay di Covid). Didto nakapamalandong ko sa akong mortality ug nisud gyud sa akong utok nga basin mao na kadto ang akong panahon.

Dako nakong pasalamat sa Kahitas-an nga human sa unom ka adlaw, nakagawas ra gyud ko pero pwerteng luyaha kay way gana ikaon. Salamat nila ni Dr. Cairo, Dr. Grecia, Dr. Balbona, mga nurses ug ubang mga higala nga nituman sa ilang tagsatagsa ka katungdanan.

Salamat sa mga higala sa Facebook ug sa personal nga nipadangat sa ilang panghinaut sa fast recovery.