Marvin G. Quilaquil / Nagsuwat & Hulagway
Bluewater Sumilon Resort / Hulagway
Isip usa ka magtutudlo dili malikayan nga bati-on ta og kakapoy sa tibuok natong kalawasan, lakip na ang hunahuna ug emosyon, tungod sa kadaghang kakulian sama sa paghimog modules, pagtudlo sa leksiyon, pagreach out sa imong mga estudyante ug paghimo og grado.
Kay lagi anaa kita karon sa new normal education diin kitang tanan puros apektado, ilabi na niadtong wadwad og paningkamot sa panginabuhi.
Mao kini ang nagtukmod kanako nga gusto mo-relax panagsa, gikan sa tanang stress nga akong nahiaguman dili lamang sa pagpanarbaho, ingon man sa tanang pagpanghitabo sa tibuok kalibutan ilabi na sa mga balita nga akong nadunggan.
STRESS RELIEVER
Usa sa maka-stress debrief kanako mao ang pagtravel sa lugar nga wala pa nako maadtoi sama sa Bluewater Sumilon Island Resort, ang isla nga dugay na nakong gipangandoy nga maka-experience sa katahom sa lugar uban sa akong katrabaho sa eskwelahan.
Sa pagtaak nako sa maong lugar nakita nako kung unsa kadako, kagamhanan ug kamaayo ang Dios sa iyang gasa alang kanato.
Gilibutan kinig kabukiran, mga kakahoyan nga naghatag og preskong hangin ug kabugnaw, limpyo ang dagat bisan og dili ka kamao molangoy maaghat ka og kaligo tungod kay maagni ka sa tin-aw sa tubig.
Gitagamtam nako ang dapit nga dinhi lang nako masinate ug wa nako palabya ang higayon sa paglibot-libot sa isla, of course apil na ang pagkuha og selfie.
Magsilbi kini nakong record nga handumon nako ang maong kasinatian sa tibuok kong kinabuhi.
ISLAND GETAWAY
Ang Bluewater Sumilon Island Resort nahimutang sa habagatang silangan sa lalawigan sa Sugbo nga nahiluna sa 24 ka ektarya nga coral island.
Naila sab ang lugar sa sandbar nga mag usab-usab ang porma ug lokasyon niini depende sa season.
Adunay natural lagoon ang isla nga milibot sa mga bakhawan.
Sa habatagan nga bahin sa maong property anaa ang lighthouse nga nahimutang sa protected tree park ug ang “Baluarte” karaang watch-tower.
“It is also home to the Philippines first marine sanctuary,” natala sa bio sa maong resort nga napatik sa ilang official Facebook page.
AMENITIES & ACTIVITIES
Adunay 14 ka deluxe nga may private veranda ang maong resort, laing 10 ka premier deluxe rooms, ug tulo ka villas nga adunay kaugalingong dipping pools.
Samtang ang ilang restaurant nahimutang sa pavilion nga nagtanyag sa mga lamian nga local ug international nga luto, bisan sa pagpanga-on mabusog ka sa panoramic view sa dagat.
Naila sab ang Bluewater sa ilang makatagbaw nga Amuma Spa.
Kon pool ang hisgutan dili kabintahaan sa ilang lagoon-shape infinity swimming pool ug jacuzzi.
Sa mahiligon og water sports activities aniay recreation activities nga gitanyag sama nalang sa scuba diving ug snorkeling sa ilang Marine Sanctuary, kayak, paddle-boating, island trek, swimming ug lagoon fishing.
Nag-offer sab og boat and city tours, whale shark ug dolphin watching (seasonal), cave tours, bird watching, ug hiking.
Unsay pay gipangita ninyo kompleto rekado nga anaa lang sa usa ka lugar, siguradong dili mo magmahay.
BLUECARES
Gumikan sa atong nasinate nga pandemiya gilimitahan sa maong resort ang physical contact hinungdan nga ilang gilusad ang BlueCARES pinaagi sa digital booking, pre-check-in, ug pagtubag sa health and registration form.
Hugtanon sab nga gipatuman ang health protocol sa maong establisemento, pahibawo sa ilang corporate communication officer Enrico Monsanto.
Sa kadtong buot mo-avail og Day Tour gikinahanglan motawag daan alang sa pag-book sa inyong slot.
Sa pag-abot sa resort gikihanglang bitbit na ang booking confirmation/voucher (print o mobile), IDs, gipahinumduman sab nga gidili ang pagdala og pagkaon ug ilimnon gikan sa gawas, pets gidili sab sa pagpasulod ug gikinahanglan nga magdala sa inyong kaugalingong snorkeling gear. /
CONTRIBUTOR
Contributor niining isyuha si Marvin G. Quilaquil, MAED, LPT, taga-Barangay Ibabao-Estancia, Dakbayan sa Mandue ug magtutudlo sa Labogon National High School.
MODAWAT OG CONTRIBUTOR
Sa mga “certified hinuroy” mamahimo ninyong i-submit sa Superbalita Cebu ang inyong kasinatian sa mga dapit nga inyong nasuroyan.
Higayon na nga mapatik dinhi sa pamantalaan ug sa Superbalita Cebu website ang inyong Suroy escapade.
Mamahimo ninyong i-submit ang inyong materials (maximum 500 words o 3,000 characters/high resolution pictures): florendaquerubin@gmail.com alang sa dugang pangutana mamahimong makatawag sa 09154410665. / EDITOR