USA ka overseas Filipino worker (OFW) nga taga syudad sa Mandaue, nga nabakunahan sa Sinopharm vaccine batok sa coronavirus disease 2019 (Covid-19), nagpositibo gihapon sa maong sakit, sumala pa sa Department of Health (DOH) 7 niadtong Miyerkoles, Pebrero 17, 2021.
Si Dr. Mary Jean Loreche, tigpamaba sa DOH 7, “highly probable” niiingon nga ang proteksyon sa maong bakuna wa pa mo-epekto. Wa pay scientific evidence sa immunity nga gihatag sa maong bakuna. Ug hayan nga ang bag-ong nitakboy mao ang bag-ong variant sa Sars-CoV-2, ang virus nga mosangpot sa Covid-19.
Unsa kaha ang epekto niining maong balita alang sa mga tawo nga di motuo ug di mosalig sa bakuna batok sa Covid-19. Ang ato lang, natakdan man gani sa Covid-19 ang gibakunahan, unsa pa kaha kadtong wa mabakunahi?
Ang tanang mga bakuna batok sa Covid-19 ubos pa sa clinical trials. Apan gipanggamit na tungod sa emergency use authorization sa nagkalain-laing mga nasod. Adunay duhay nga nakit-ang epektibo. Wa pa maapil ang bakuna sa Sinopharm gikan sa China.
Si Dr. Loreche niingon nga ang 43-anyos nga OFW nga way mga sintomas, nakadawat sa unang dose sa bakuna sa Sinopharm didto sa United Arab Emirates (UAE) niadtong Disyembre 12, 2020 ug sa ikaduhang dose sa Enero 2, 2021.
Si Atty. Julius Caesar Entise sa contact tracing team sa Mandaue City’s Emergency Operations Center (EOC) niingon nga ang maong OFW niabot sa Sugbo niadtong Enero 5, 2021 ug nakahuman sa iyang mandatory quarantine niadtong Enero 20.
Ang maong taho usa sa mga butang nga makapabalaka kanato. Ang gobyerno gusto na nga ibutang sa modified general community quarantine (MGCQ) ang tibuok nasod sugod sa Marso 1. Apan wa pay bakuna nga niabot.
Gawas nga wa pay bakuna nga miabot, wa pa usab kita masayod kon unsa ang matang sa bakuna ang moabot. Way di gusto nga makabangon ang atong ekonomiya. Apan angay nga seguruhon ang kinabuhi sa mga tawo.
Hinuon, di ingon ka daghan ang nangamatay sa Covid-19 kon itandi sa nangamatay sa ubang mga balatian. Ang problema sa Covid-19 kay dali kaayong manakod. Unya magpadayon kadtong mga mapahimuslanon sa pagpangurakot gikan sa bugas ngadto sa mga isolation centers.