Gibasura sa Presidential Electoral Tribunal (PET) ang electoral protest ni kanhi senador Fedinand “Bongbong” Marcos batok kang Bise Presidente Leonor “Leni” Robredo hapit lima ka tuig human kini gisang-at niadtong 2016. Unanimous, sa ato pa ang tanang 15 ka justices, apil ang chief justice, ang mihukom niini. Duna pay kumento ang kampo ni Marcos sa maong desisyon apan lisud na kining mausab.
Ako nagtuo nga dugay na usab nga nangandam ang grupo ni Bongbong alang sa iyang pagdagan pagka-presidente sa 2022. Gani aduna nay mga hugon-hugon nga mahimo niyang running mate si Davao City Mayor Sara Duterte Carpio, kon dili kini mudagan sa pagka-presidente. Tingalig tawgon kinig “Mar-Ca” (Bongbong Marcos-Sarah Carpio).
Sa laing bahin, ang oposisyon mipugos na kang Leni Robredo paglansar pagka-presidente paris kang Kiko Pangilinan. Kon mahinayon, tawgon kini og “Le-Ki.” Anaa usab si Senador Manny Pacquiao nga murag nangandam na alang sa presidential election. Naa na siyay organisasyon sa tibuok Pilipinas, apil na dinhi sa Sugbo. Usa ka higayon miapil siya sa popular nga programa ni Willie Revillame alang sa dugang exposure. Ang iyang gisaligan sa Norte mao si Narvacan, Ilocos Sur Mayor Chavit Singson. Kontrulado nila ang Ilocos Sur. Kon si Chavit maoy iyang ma-bise tawgon kinig “Man-Cha.” Kon si Senador Ping Lacson maoy iyang maparis tawgon kining “Pa-La.” Daghan pang mga personalidad ang mutoyhakaw kon magkaduol na ang piniliay.
Hinaut pang human sa imbestigasyon sa Senate Blue Ribbon Committee nga pinangulohan ni Senador Dick Gordon masulbad na kining langay nga pag-release sa license plates sa mga motorsiklo. Angayang masayran nga kon mopalit ka og motorsiklo pabayron kana sa registration niini apan dili ka pa hatagan og OR/CR. Tungod niini, dili nimo magamit ang imong motor bisan kon dugay na nimong nabayran ang registration fee kay dakpon ka kon imo kining gamiton.
Karon gipasanginlan sa lima ka mga motorcycle dealers si Land Tansportation Office (LTO) 7 Director Victor Caindic nga nangayo kuno kanila og P500 matag motorsiklo nga mahalin. Tungod kay wala sila muhatag maoy katarungan nga gidugay-dugay ang pag-release sa OR/CR, sumala sa maong mga dealers.
Hinaut pang ma-release na dayon kining OR/CR human kini mabayri. Kanang away ni RD Caindic ug sa mga motorcycle dealers hinaut pang dad-on kini didto sa Office of the Ombudsman ug sa korte aron dili maapil og kahasul ang mga ordinaryong tawo nga mamalit og motorsiklo aron magamit niining panahon sa pandemya.
(mannyrabacal1144@gmail.com)