Daghan ang naluoy sa mga Lumad human makita sa video coverage sa media sa Sugbo ang gubot nga “rescue operation” sa mga bata sulod sa compound sa retreat house sa University of San Carlos (USC). Nigawas nga kontrabida ang Philippine National Police (PNP).
Unsa man diay to nga operation, sa Philippine National Police (PNP) o sa Department of Social Welfare and Development (DSWD) nga maoy gi-contact nga ahensya sa Davao del Norte Provincial Government?
Ang Cebu City social welfare office na mismo ang niingon nga sila ang nagpa-assist sa PNP aron sa pagkuha sa mga bata human modangop sa ilang kaubang mga buhatan ang mga ginikanan sa mga bata nga Manobo.
Duna usay presensya sa National Commission on Indigenous Peoples (NCIP) aron pagseguro nga way malapas nga katungod sa mga Lumad nga Manobo.
Apan bisan pa niini, nilutaw nga kadto puro lang police operation bisan sa presensya sa ubang mga ahensya sa kagamhanan nga gipangulohan sa DSWD nga maoy ni-request og police assistance.
Nalubog na usab ang estorya sa propaganda tali sa mga progresibong grupo ug sa PNP. Namasangil ra ba ang kapulisan nga gibansay nga child warriors ang kabataan. Kalisod baya tuohan ning mao nga pasangil.
Simple ra ang isyu. Duna bay pagtugot ang mga tawo nga nagdala sa kabataan dinhi sa Sugbo? Kon duna man, ipresentar ang mga dokumento. Kay bisan pag moingon sila nga kabubut-on sa kabataan ang pagkuyog kay alang kini sa ilang kaayuhan, mga menor de edad pa sila busa kinahanglang dunay pagtugot sa mga ginikanan. Tiunay ug tarong ang ilang tumong, apan kon wa masubay sa balaud ang ilang pagdala sa kabataan, kinahanglan silang manubag kon dunay nalapas.
Unta, ipadaplin na ang isyu nga harassment ug trauma kay ang mas angay ug haum nga makasulti ini mao ang social workers.