Nahimong unang kampyon sa Activehub’s Lumba sa Isla Adventure Race Challenge ang team Tres Islas Adventure Racers human sila motali og pinakataas nga puntos sa maong kompetisyon niadtong Pebrero 13, 2021 didto sa Olango Island.
Ang kuponan sa Tres Islas Adventure Racers mitapos sa maong kompetisyon nga adunay 98 puntos og mihuman sa maong lumba sulod sa unom ka oras 12 minutos ug 35 segundos.
Dili lang speed ang gisukod sa lumba kay kinahanglan kini og accuracy sa mga challenges nga gihatag sa mga organiser.
Ang tanan team miagi og 20 ka mandatory checkpoints og makakuha og 5.0 puntos ang team kon makompleto ang challenge sa checkpoint.
Human makompleto na ang tanang 20 molahos na sa finishing point ang team. Human sa 20 ka challenges nga galangkob sa run/trek, bike, swim, obstacle based, cognitive challenges, paddle/water sports ug special tasks, miguwa nga ang Tres Islas ang adunay pinakataas og puntos.
Gisundan kini sa Boguy Bikers nga adunay 87 puntos ug Team Triple A, XT-Cool Team ug Team Abtik 1 nga adunay 86 puntos matag-usa.
Ang Team Bitay (84), Team Abtik 2 (81), Team Fit and Flow (77) ug Smarties lang Malakas (74) anaa sa ikaunom ngadto sa ikasiyam nga luna sa kompetisyon nga gi-organisar sa Active Hub Fitness ug gisuportahan sa Lapu-Lapu City Sports Commission ug sa Lapu-Lapu City LGU.
Gi-organisar sa Active Hub Fitness ang maong adventure race aron idasig ang katawhan nga magpadayon sa fitness labi na karon sa panahon sa global health pandemic. Ang maong fitness hub nag-organisar pud og Virtual Cyclothon ug Active Woman Bike Challenge.