Gikan sa pulong sibo o patigayon ang Cebu nga usa ka fishing village ubos sa pagpangulo nila Rajah Humabon ug Rayna Juana. Una ug karaang dapit sa nasod nga maoy duyan sa
Kristyanismo sa Halayong Sidlakan. Nahimong lungsod sa 1901, siyudad sa 1937 sa resolusyon 185 nga gipanday ni Konsehal Gervacio Lavilles.
Gibaswat ug gipangamahanan ni Don Vicente Rama sa Batasang Pambansa o nasodnong asembliya ang balaudnon 1428 sa Agusto 1936 aron ang Cebu mahilumbay sa mga siyudad sa Manila ug Baguio nga dunay kaugalingong charter nga mauswagon. Sa sinugdanan supak sila deputado Abellana ug Rafols sa Sugbo.
Apan sa plebisito sa nasodnong asembliya 64 miuyon, tulo misupak, tulo wala moboto ug 26 wala motambong. Sila Gov. Sotero Cabahug ug Presidente Munisipal Marcos Morelos ingon man ang Cebu Chamber of Commerce ug Rotary Club mipadangat og sulat kang Pres. Manuel L. Quezon naghangyo nga bitohan ug patyon ang maong balaod aron di matibhangan ang kita sa probinsya apan wala tagda.
Gihangyo sab si Speaker Gil Montilla nga dili pirmahan apan wala gihapon makab-ot ang tinguha sa pagbabag. Gitiman-an ni Pres. Manuel L. Quezon ang Commonwealth Act 58 sa Okt. 20, 1936 dayag nga usa ka dahon sa handomanan nga dili hikalimtan. Peb. 24, 1937 maoy pagpatuman sa deklarasyon paghingpit sa Cebu City Charter panahon ni Mayor Alfredo Jacinto nga maoy gisundan ni Mayor Fructuso Ramos. Apan sa Nob. 26, 1983 gitudlo ni Quezon si Rama nga mayor sa Sugbo gikan nga deputado sa nasodnong asembliya.
Pinaagi sa Republic Act 7827 ni Rep. Raul del Mar nagdeklarar matag Peb. 24 nga non-working holiday.
Kadto si Konsehal Lavilles lumad nga taga Lambunao, Iloilo nanimpalad dinhi sa Sugbo sa edad nga 14. Misulod pagakasuluguon kansang agalon mipatungha kaniya. Nahimong mediaman, abogado, maestro ug napiling konsehal sa 1925-1935.