Nagbaha ang mga text message ug ang akong messenger sa mga mesahe may labot sa nikatap nga abiso sa giingong Covid-19 hotspot sa dakbayan sa Sugbo.
Nag-unang pangutana kong unsa ka tinuod ang giingong hotspot. Giunsa daw pagkasayod sa mga hingtungdang ahensiya nga ang mga dapit nga gihisgutan tinubdan sa makamatay nga virus?
Ang akong tubag di angay nga maalarma hinuon gikinahanglan ang dobling pag-amping ning panahon nga padayong nisaka ang mga kaso sa tinakdanay.
Angay pa ba gud nang ika alarma nga mosugot ta og sa dili gikan pa niadtong Abril hanghtod karon naa pa man ang maong virus og padayong nanghasi. Pananglit ang ilang giingon nga usa ka mall ang nalakip sa listahan sa hotspot sa maong petsa.
Kadtong nakasuroy sa maong dapit di angay nga mabalaka kong sa mga protocol nga gipatuman wa ka magpabaya.
Sa ato bisan asa ka pa moadto kong dili nimo sundon ang angay nga buhaton mahimong kandidato ka sa tinakdanay.
Mao nay giingong tungod kay dili makita ang virus, ug ang carrier niini dili sab mailhan unsa may atong dag-anan.
Busa ang mga pahimagno sa padayon nga pagsul-ob sa face mask, face shield, social distancing ug pagpanghugas sa kamot angay nga hinumduman kanunay bisan kong naa ra ka sa sulod sa inyong balay.
Gidapit ko og paniudto sa usa ka higala sa usa ka kan-anan sa uptown Cebu City niadtong Huwebes. Untop gyud alas dose sa udto mi nisud. Medyo mahalon ang maong kan-anan basi sa iyang set up ug mga pagkaon nga nalista sa ilang menu nga naglakip sa presyo.
Pagka human namo og kaon wa dayon mi nigawas og nagkalingaw og kokabildo. Paglabay sa usa ka oras nihukom mi nga mogawas human mabayri ang among gikaon. Lisora na gyud sa patigayon rong panahona. Gikan sa among pagsud hangtod sa among pag gawas kami ra ang kustomer niadtong higayona.
Akong nasayran nga di mabintahaan ang maong restaurant kong kustomer ang hisgutan niadtong panahon nga wa pa ang pandemiya.
Ang pangutana kong makalahutay ba apiil na ang ubang kan-anan ug imnanan diin nagminghoy ang mga nagbantay kay tagsa nalang kaayo masudlan og kustomer.
Kining maong mga establismento di pa raba dugay nga nakabalik og pangabli, apil na ang pag-renew sa ilang mga business permit. May mga insintibo ba silang mapaabot gikan sa gobyerno?
Ang akong gipasabot , ayuda sa bisan unsang paagi nga dili kaayo sila mabug-atan ning panahon sa pandemya.
Ang ilang mga empleyado may mapaabot ba nga ayuda gikan sa gobyerno ning panahon nga wa na magtultul sa saktong adlaw ang ilang pagreport sa trabaho.
Ang uban nila ka tulo nalang mo-duty sa usa ka semana. Ayaw mo og kahibulong nga bisan kong namalik na ang mga PUJ daghan gihapon ang nagbisiklita. Mga trabahante kana sila nga nangayawat.