Luhong balay sa giingong big time drug lord, Charlie Duhaylungsod, nga nadakpan niadtong 2019 sa anti-drug operation sa Police Regional Office 7 gi-freeze sa korte.
Si Duhaylungsod nakuhaan og kapin sa tulo ka kilo nga shabu nga mokantidad og P47 million sa buy-bust kaniadto.
Nangunay sa pagtaod sa pahibawo ang hepe sa Philippine National Police, Police General Debold Sinas, uban sa mga opisyal sa Anti-Money Laundering Council (Amlac).
Ang balay nahimutang sa usa ka eksklusibong subdivision sa Barangay Cubacub, Siyudad sa Mandaue.
Napalit ni Duhaylungsod ang balay niadtong 2019 sa kantidad nga P14 million nga cash.
Sa gihimong appraisal sa Amlac, mokantidad na kini karon og P20 milyones.
Matod ni Mel Racela, executive director sa Amlac, nga daghan og mga kabtangan ni Duhaylungsod sa Dakbayan sa Ozamis ang na-freeze na sa korte.
Lakip na niini ang siyam ka bank accounts nga adunay deposito nga P3 million.
Gawas niini, aduna pay mga sakyanan ang luwatan og freeze order.
Dugang ni Racela nga human sa unom ka buwan, ang Amlac mo-file sa korte og civil forfeiture aron mabawi kini pabor sa gobyerno.
“Sunodsunod na imbestigasyon ito jointly by the PNP at saka ng Amlac, so nag-umpisa po ito sa Ozamis at mayron din tayong na imbestigahan doon at dumiretso sila dito lumipat sila sa Cebu. So yung mga properties nila both sa Ozamis at sa Cebu,” matod ni Racela.
Si Sinas nihulagway kang Duhaylungsod nga usa sa labing dako nga drug lord sa Pilipinas.
Ang iyang area of distribution mao ang Dakbayan sa Mandaue, Lapu-Lapu, pipila ka lugar sa Siyudad sa Sugbo ug Probinsya. Ang mga ginikanan niini matod ni Sinas konektado sa mga Parojinog sa Mindanao nga mao usab ang nag supply kaniya sa illegal nga drugas dinhi sa Sugbo.
“Actually malaki sila, base sa findings namin during the operations last 2019. Ang nakuha dito ay 3.8 kilos, based on our reports. Malaki po sila. Sila po ang nag se-service sa metro Cebu,” matod ni Sinas.
Si Duhaylungsod naa pa nabilango sa Mandaue City Jail samtang nagpadayon pa ang iyang kaso. (AYB)