KON dunay magpabadlong nga usa, ang pagtan-aw sa mga tawo sa usa ka grupo, tanang mga miyembro kwanggol na. Pananglitan, dunay usa, duha o tulo ka siklista ang nahinanggaw sa dalan, i-generalize na dayon nga ang tanang nagbiseklita way batasan kon naa na sa dalan. Ingnon dayon nga abusado, way tahod sa traffic laws.
Sa tinud-anay, pipila ra na sila ka buok nga way tahod sa balaud sa trapiko. Kadaghanan nagsunod baya kay nakahibawo sila nga alang kini sa ilang kaluwasan. Apan ang nakapait kay sa mga forum sa social media, sawayon ang mga nagbiseklita kay way tahod ug way batasan samtang nagsikad.
Bitaw, nakakita na ko og mga tawo nga nag biseklita nga bisan stop signal, mitabok. Sa ako lang pagsubay sa karsada, nakakita ko og mga nag bike nga wa motahod sa traffic laws, labina sa stop ug go.
Gikinahanglan nga tumanon ang balaud sa trapiko aron di madiskuhido. Gihimo ang balaud, gibutang ang mga suga sa trapiko alang sa kaluwasan sa mga motorista ug pedestrian. Busa importante ang pagtuman sa balaud sa trapiko.
Naa ra bay ubang netizen, bisan gani media, diretso og pangomentaryo or post nga wa gani makahibawo sa unsay tinud-anay nga estorya.
EHEMPLO
Usa ka example ini kadtong gi post nga traffic ticket sa usa ka biker nga giisyuhan kuno kay way lisensya. Unya diay, ang duplicate nga kape diay to nga ang badlis didto sa sayop nga violation. Gidakop ang biker kay nitabok bisan go signal.
Gipadad-an ko og kopya sa akong higala nga si Joy Tumulak, pangu sa traffic office sa Dakbayan sa Talisay. Kay nangutana ko niya human ko makakita sa gi-share nga post sa Cebu Road Heroes. Haskang luoya sa traffic enforcer, nahimong bogu tungod lang sa sayop nga post.
Wa maisyuhi og ticket sa violation ang nagbiseklita kon nituman pa siya sa balaud sa trapiko. Maayo usab unta kon ang tanang local traffic offices mopatuman sa mga balaud sa trapiko, motorista man o nagbiseklita. Makiangayon man nga ipatuman kon unsay nalatid sa balaud aron wa nay mag-abusar sa karsada.
Kon ikaw nagbiseklita, bisan asa man, kon dunay traffic light, kinahanglan nga imo kining sundon kay sa imong paglapas, ang tanan nga nagbiseklita tan-awon dayon nga way ayo.
MAG-AMPING
Naguol kong gatan-aw sa shared video adtong mga batan-on nga nanulhog sa Busay nga nagkiat lang. Sa akong nasabtan, usa adto nila ang naaksidente nga naglambigit sa Ceres bus.
Bisan kaming mga daan nang tig bike nakasaway sa ilang kinaiya. Mao na nga kon dunay maaksidente nga biker, unya gakiat lang, di mi makasimpatiya. Kay kon mag-amping lang sa pagmaneho sa biseklita, kuli ang aksidente.
Kinahanglan nga ibutang kanunay ang kaluwasan bisan asang dapita magbiseklita aron kalikayan ang disgrasya. Di dapit sa exhibition o magpakitang gilas sa karsada kay naa bayay daghang mga motorista.
Mag-amping kanunay sa karsada kon magsakay ka sa biseklita. Tuman sa balaud sa trapiko.