Sa unang pagkadungog pa lang nako nga dunay gipahigayong rescue ang kapulisan sa mga batang Lumad gikan sa mga kamot sa rebelde sulod sa University of San Carlos Talamban Campus (USCTC), nasabtan na nga dunay hinanggaw kining maong operasyon.
Gisamotan nga gitahong ang mga batang Lumad naa kuno sa usa ka NPA training center apan ang giadto sa kapulisan mao ang retreat house diha sa USCTC campus.
Mahibong lang ko sa pipila nga nag-cover sa maong giingong rescue kay wala nila gihulagway kon unsa gyud diay ang retreat house. Naa ba kini sa usa ka lasang? Gihimo ba kining training center alang sa mga rebelde?
Nakaanha man gud ko sa maong retreat house kadtong padung og gradweyt sa high school ang usa nako ka anak. Unya, sa video sa pagdakop, wa man mausab ang porma sa sulod. Di man siya training center og mga rebelde.
Nakahibawo sab niini ang linibo nga tinun-an sa USC ug mga alumni. Apan, nahimong ko nganong gibalewala sa mga nag-cover ang maong punto.
Mao nga akong gibalik-balik og tan-aw ang mga video kon duna bay ebidensya sa ubang mga punto nga gibalita. Apan daw wala makaila sa mga giingong mga ginikanan ang mga bata. Wa say mga reporter nga nakahunahuna sa pag-interview kanila. Kadto rang giingon nga igsuon sa namatay. Huh?
Karon, gibalikbalik ang propaganda nga kini recruit center sa NPA. Wa gipanumbaling ang pamahayag sa SVD ug Archbishop Jose Palma kabahin sa maong Lumad school. Makahinumdom ko sa estilo ni Adolf Hitler nga ang bakak, kon sigi og balikbalikon, mahimong tinuod sa hunahuna sa mga tawo.