GISUGYOT karon sa Acting Socioeconomic Planning Secretary and Neda chief Karl Kendrick Chua nga ibutang ang tibuok Pilipinas ubos sa modified general community quarantine (MGCQ) nga mao ang pinaka-ubos og relaxed nga quarantine status sugod karon Marso 1. Ang rason ni Chua mao nga mobangon na ang ekonomiya gumikan kay daghan gihapon karon ang naapektuhan sa quarantine status gumikan sa estrikto nga pagpatuman sa mga health protocols.
Ang National Capital Region (NCR) ubos gihapon sa general community quarantine (GCQ) diin daghan gihapon nga mga commercial establishments o mga patigayon nga wala pa maka-operate og balik. Samtang sa ubang bahin sa nasud sama dinhi sa dakbayan ug lalawigan sa Sugbo ubos kita sa MGCQ.
Maayo ba kini? Lahi baya ang situwasyon sa mga urban areas o mga dakyaban sama sa Metro Cebu ug didto sa lalawigan. Karon, ilang usahon. Aw, mobalik na lang ta sa normal tanan puslan man.
Hangtod karon wa pay usa ka eksperto sa tibuok kalibutan nga makasiguro kon unsay padulngan niining Covid-19 pandemic ning tuiga ug sa mosunud pang mga katuigan. Ang tanang banggiitang mga scientists nagkahiusa ug nagkauyon nga daghan pang mga butang ang angayan diskobrihon ning maong kagaw. Ug samtang dako pa ug kuwang ang mga pagtuon magpabilin usab ang pagka-walay kasiguruan sa tanang natong gihimo sa pagsulbad ning maong pandemya.
Hinungdan nga angay tingali nga hunungon nato ang pagtuo ang atong kaugalingon nga naa pay bakuna mapapas na ang tanan natong kabalaka ug kahingawa batok ning maong kagaw. Kon naa nay bakuna, mapakasama na lang nato nga usa ka daman ang Covid-19 og dili na kini maghasol pa kanato.
Dako kanang bakak. Kay atong angkunon kining tanan karon nga atong gihimo pulos lang ekspireminto o pagsuway-suway lang. Ug dili nato kalimtan tanang pagsuway-suway kanunay gyud nga gi-ubanan og palpak nga mga desisyon. (bobbygnalzaro@gmail.com)