GIKATAHAPANG tulisan nadakpan human ilang gibiktima ang usa ka nurse sa Biyernes sa alas 10:00 sa gabii, Pebrero 19, 2021 sa Brgy. Tungkop, Lungsod sa Minglanilla.
Nangayo og panabang sa kapulisan si Sharee Ann Gargar, 35, minyo, nagpuyo sa Minglanilla, human gitulis sa duha ka mga lalake nga nagmotorsiklo.
Nakuha ang iyang backpack ug pitaka nga dunay P3,000, identification (ID) card, uniform ug automated teller machine (ATM) card.
Si Major William Homoc, hepe sa Minglanilla Police Station nga nahinabi sa Superbalita Cebu, nagkanayon nga nipahigayon sila og manhunt operation batok sa mga suspek, usa kanila giilang si Christian Jess Lobero, 20, alias Hapon, taga Poblacion Ward 1, Minglanilla.
Si Lobero, matod ni Homoc, positibong nailhan ni Gargar si Lobero pinaagi sa rogue’s gallery sa mga notadong tulisan sa Minglanilla, nga maoy mition niyag armas, nideklarar og tulis.
Ilang nasikop si Lobero sa alas 6 sa buntag sa Sabado, Pebrero 20, apan nakasibat ang iyang kauban nga si Christopher Gica, 34, taga Barangay Inayagan, Dakbayan sa Naga.
Narekuber sa kapulisan sa possession ni Lobero ang mga gamit ni Gargar, armas nga .22 caliber revolver nga dunay duha ka mga bala ug duha ka medium nga putos sa gituohang shabu. (GPL)