MGA lokal nga kagamhanan, Provincial Disaster Risk Reduction and Management Office (PDRRMO) ug kapulisan sa Sugbo nangandam sa pag-igo sa bagyong Auring sa Dominggo, Pebrero 21, 2021.
Ang PDRRMO nipaandam sa tanan nga personnel pinaagi sa pagbutang sa tibuok Sugbo sa red alert status.
Sa weather bulletin sa alas 4 sa hapon sa Philippine Atmospheric Geophysical Astronomical Services Administration (Pagasa), ang tibuok Sugbo ubos sa signal no. 1 bisan nihinay og gamay ang gikusgon sa hangin sa bagyo.
Nagdala usab kini og kusog nga uwan hinungdan sa kabalaka sa mga opisyal.
Ang Cebu Police Provincial Office (CCPO) ubos ni Police Colonel Alladin Collado nimando usab sa tanang police stations sa mga siyudad ug kalungsoran ubos sa command niini nga mag-standby sa ilang buhatan aron dali silang makaresponde kon dunay manginahanglan og tabang.
“We already alerted most of the towns in the northern part of Cebu and in fact, the whole province,” matod ni Collado.
Dugang ni Collado nga iya usab nga gimandoan ang mga hepe sa matag police station nga mag-recorida aron pahimangnoan ang mga namuyo sa daplin sa kabaybayonan nga magbantay tungod sa pagsugod na og dako sa balod.
Kon kinahanglan, ila kining pabakwiton agi og panagana kon naghulga na sa ilang kinabuhi.
Andam na usab ang mga hospital ug medical personnel sa probinsya, matod sa PDRRMO.
Moabot sa 13 ka mga uniformed personnel ug reservists ang gipakatap sa mga lugar nga taas og risgo sa pagbaha ug pag dahili sa yuta sama sa lungsod sa Tuburan ug Asturias.
Aron masiguro nga luwas sa trahedya, 62 ka mga balay sa Dakbayan sa Danao gipabiyaan una sa mga pamilya.
Ang mga evacuees nga taga Isla Verde anaa gipahimutang sa Dunggoan Elementary School.
Tungod sa pagkuso-kuso sa balud sa kadagatan moabot usab sa 165 ka mga pasahero, driver ug crew ang natanggong sa pantalan tungod sa kusog nga hangin ug balud.
Sa maong datos, 70 niini mga crew sa barko samtang 21 ang mga pasahero gikan sa Santander paingon unta sa isla sa Negros.
Samtang 37 ka mga pasahero ang na stranded gikan sa San Remigio paingon sa Santa Fe; 33 gikan sa Dakbayan sa Danao paingon unta sa Isla sa Camotes, tulo gikan sa Daanbantayan paingon sa Isla sa Carnaza ug usa gikan sa Dakbayan sa Bogo paingon sa Manila.
Sa Lungsod sa Santa Fe giandam na niini ang mga food packs alang sa mga mananagat nga labing apektado sa bagyo.
Sugod alas 12 sa kaadlawon, sa Pebrero 21, wa paagii ang Manipis Road (Talisay-Toledo Access Road) pagsiguro nga luwas sa disgrasya. Giabisohan ang mga motorista nga moagi sa Naga-Uling access Road.
Samtang gipahunong usab ang tanan nga mga kalihukan sama sa canyoneering, fishing, zipline ug uban pang water activities hangtod sa Pebrero 22 sa lungsod sa Badian paglikay sa disgrasya.