GIPATUMAN og balik sa dakbayan sa Mandaue ang liquor ban sugod sa Sabado, Pebrero 20, 2021.
Niluwat si Mandaue City Mayor Jonas Cortes og Executive Order (EO) No. 9 sa pagpatuman og balik sa liquor ban ug pagpabalik sa importante nga guidelines ubos sa modified general community quarantine (MGCQ).
Gisaysay sa EO 9 nga bisan kinsa lakip na nag mga tag-iya ug manager sa mga hotel, resorts, restaurants, convenience stores, sari-sari store ug ubang establisemento gidid-an sa pagbaligya ug moinom sa bisan unsang mga ilimnong makahubog.
Kini gipatuman sa Dakbayan tungod kay sa pagsulod sa Enero 2021, nisugod og grabe ang pagtaas sa mga kaso sa Covid-19 sa dakbayan.
Gani sa maong buwan, ang average nga bag-ong kaso matag adlaw 13 kabuok.
Apan, sa datos sa Dakbayan sa Pebrero 1-19, moabot na ang average nga bag-ong kaso og 35.
Usa sab sa gikonsiderar sa Dakbayan sa pagpatuman sa liquor ban mao ang gianunsyo sa Department of Health (DOH) 7 nga adunay gidudahang bag-ong “homegrown” nga Covid-19 variants sa Sugbo.
Tungod niini, nakita sa kagamhanan ang panginahanglan nga pahugtan ang pagpatuman sa mga sumbanan sa MGCQ ug ibalik liquor ban aron malikayan ang di mahinungdanon nga mga pagtapok nga mamahimong makapakatap sa virus.