USA ka kilo nga gituohang shabu nga gisukip sa usa ka kargamento gikan sa Malaysia nasakmit sa Philippine Drug Enforcement Agency (PDEA) 7 ug Bureau of Customs (BoC) sa Sabado sa hapon, Pebrero 20, 2021 sa usa ka lumolupyo sa Barangay Cogon Ramos, Siyudad sa Sugbo.
Ang shipment gikan sa usa ka babaye, kinsang ngan gipugngan una ning mantalaan, samtang naka address kini kang Zoilo Gabas, 23, taga Barangay Cogon Ramos.
Si Gabas gidakop gilayon sa iyang pagdawat sa shipment nga dunay sulod nga usa ka kilo sa gituohang shabu balor og P6.8 million gikan sa representante sa usa ka courier company.
Matod ni A1 Jessie Cabutotan sa PDEA 7, usa ka controlled delivery ang operation inabagan sa Bureau of Customs (BOC).
Dugang ni Cabutotan nga ang kontrabando niabot sa Pilipinas gikan sa Malaysia agi sa tugpahanan sa Clark.
“Bakit controlled delivery operation? Kasi du’n pa lang sa Clark International Airport sa Pampanga, ang mga operatiba doon sa paliparan, nakitaan na nang pagduda ang package na ito. So, para mahuli kung sino ang nag mamay-ari nito, i-deniliber sa kanya. Kaya ito matapos niyang (Gabas) ma-received, kinasa na ang paghuli sa kanya,” pasabot ni Cabutotan.
Malampuson kining nahatag ngadto kang Gabas tungod sa pag-abag sa courier.
Ang shabu gisulod sa usa karton nga dunay appliances, mga air fryer, diin ang pinutos nga shabu gipailadman, giputos sa usa ka itom nga plastik nga gipahaum aron di mabantayan.
Bisan pa niini, dihang gipaagi sa X-ray machine sa Clark, nakita nga kadudahan ang putos nga tinuyo ang pagkabutang.
Si Gabas niangkon nga dunay sulod nga shabu ang shipment ug ikatulo na unta kini niyang nadawat.
Matag shipment nga iyang mahatod ngadto sa usa ka Gonz, suholan siya og P5,000.
Matod sa PDEA 7 nga si Gonz usa ka inmate sa Cebu City Jail.
Samtang si Daryl Panulaya, investigator 1 sa BoC, niingon nga dili lang kini ang labing una nga modus nga ilang napakgang.
Pinaagi sa higpit nga pagbantay, ilang ma-detect ang drugas nga ipalusot.
Dugang ni Panulaya nga sa hugot nga kampanya karon batok sa mga kontrabando, ang ilang kadagkuan sa BOC miawhag sa tanan nga mga courier company nga kon mahimo magbutang og mga X-ray machine sa ilang receiving area aron masusi ang matag usa.