MAGTIAYON nakaplagang patay sa ilang mga kabanay sa Sabado sa alas 11 sa buntag, Pebrero 20, 2021 sulod sa ilang jewelry repair shop sa Punta Rizal Street, Barangay Pajo, Dakbayan sa Lapu-Lapu.
Gituohan sa mga imbestigador Station 3 sa Lapu-Lapu City Police Office nga unang gipatay sa bana ang iyang asawa pinaagi sa pagtuok gamit ang usa ka cable wire.
Human niini, gituohang naghilo ang bana gamit ang kemikal sa paglimpyo sa mga alahas.
Si Police Staff Sergeant Dexter Almario, desk officer sa Station 3, niila sa magtiayon nga sila si Giovanni Lopez Capangpangan, 45, ug si Mechelle Modina Capangpangan, 38, puro taga Poblacion Occidental, lungsod sa Consolacion.
Ang magtiayon nanag-iya sa Denash Jewelry Repair Shop nga nahimutang sa dapit.
Si Almario nga nahinabi sa Superbalita Cebu niingon nga nahibung ang mga kabanay nga sirado ang shop sa magtiayon samtang nag-andar ang aircon unit.
Ang igsuon ni Giovanni nga si Eva Capangpangan Patalinghug mao nay nisugo sa usa ka panday sa pagpugos sa pag-abli sa shop pinaagi sa pagguba sa pultahan kay way nanubag gikan sa sulod.
Sa ilang pagbukas, nakaplagan ang nagsugod ang nag kadugta nga mga lawas sa magtiayon. Gitawgan dayon ang mga Station 3 mga pasado alas 12 sa udto.
Matod ni Almario nga hayan taudtaud nang patay ang magtiayong Capangpangan.
Dunay nakaplagang suwat ang mga imbestigador nga gituohang gikan sa amahan alang sa ilang mga anak.
“Mga anak, morani tubag sa tan. Kuyog ko sa iyo mama. Pasayloa ko,” kutlo ni Almario sa gituohang suicide note sa amahan nga ilang nakaplagan.
Wa sila masayod sa motibo, apan matod ni Almario nga usa ka kabanay nisulti nga gustong makigbuwag nii Mechelle kang Giovanni sa wa usab mahibaw-ing hinungdan.
Matod ni Almario nga Huwebes wa na mauli ang magtiayon sa ilang balay busa ang mga anak nipahibawo kanila ni Patalinghug.
Dali nilang gisusi ang shop sa magtiayon nga nag-abang lang sa dapit.
Matod ni Almario nga hayan ang kable nga nakaplagan sulod sa shop maoy gigamit ni Giovanni sa pagtuok sa iyang asawa.
Human ini, niinom kini og kemikal nga gigamit sa paglimpyo sa mga alahas base usab sa ilang nakita sa sulod sa shop.
Ang asawa naa sa usa ka katre naghayang samtang ang bana sa sawog nga semento sa ubos nagligdas.
Nagtuo si Almario nga posibleng sa Biyernes patay na ang magtiayon base sa nagkadugta nang mga lawas.
Wa say nakamatikod og kasikas sa silingang mga establisemento. (REV)