Genoguin: Kabaliktaran

Kining atong kulom kon duna may maigo pasensiya na, kay duna may panultihon nga nagkanayon, "Sakit daw dawaton ang kamatuoran kon mabisto na, apan mas labaw'ng sakit ug dili gyud madawat ang dili tinuod."

Kining nahitabo sa 19 ka mga menor de edad, nga ang 13 gikan sa lungsod sa Talaingod, Davao del Norte ug ang 6 gikan sa mga dapit sa Sultan Kudarat, kapin sa duha ka tuig na ang milabay nawala sila sama sa bula, nga wala intawon mahibalo ang mga ginikanan kon asa na ang ilang mga anak.

Sa ngadto-ngadto ingon sa hinay-hinay na lang intawon gidawat sa mga ginikanan nga basi'g gikuha na ni Lord ang ilang mga anak o kaha gitukob ba sa bakunawa. Apan ang nakapakurat kay gitukob diay sa komunista.

Gikan sa bukirang bahin sa Talaingod gikidnap ang mga menor de edad nga mga lumad ug gidala didto sa San Carlos University sa dakbayan sa Sugbo aron edukahon sa idolohiyang komunista, ug trinihon nga mahimong combatant ug mahisakop sa New People's Army (NPA), ang military armed sa Communist Party of the Phlippines (CPP).

Mga salugpongan nga teachers, mas labaw'ng nahibalo kon kinsay nagdagit sa mga kabataan, ug dili sad basta-basta kining mga maestraha kay mga graduwado sa University of the Philippines (UP) ug tingali mas dagko pa sila'g mga suweldo nga ginadawat sa mga magtutdlo nga gisuweldohan sa gobyerno.

Dili na nimo ma-under estimate ang kalihukan karon sa komunista sa Pilipinas kay dagko na sila'g kita pinaagi sa pagpangobra og revolutionary taxes ug ang mga suweldo, nahibawo namo kon kinsa ni sila.

Kabaliktaran ang nahitabo kay human hisayri sa mga awtoridad nga didto diay gidala sa Sugbo ang mga menor de edad nga mga kabataan, ug ilang gi–rescue, mga kapulisan na man hinuon ang ipa-imbestiga? Ang Makabayan block nga naigo sa "red tagging" nga nagtakuban nga sakop sa CPP nga may mga representante sa Kongreso nagpasa og Resolution Number 1590 nga imbestigahan ang mga miyembro sa kapulisan nga nag-rescue, inay ang nagdagit sa mga kabataan.

Ang ilang mabaw nga katarungan nga ila daw gibalhin ug pinuy-anan ang mga kabataan tungod kay nagkagrabe na daw ang Covid-19. Pero, kon imong mahinumdoman sa milabay'ng bulan sa Marso 2020, mao pa'y pag-abot sa Covid-19 dinhi sa atong dakbayan sa Davao? Ug wala pa gani ni isa nga namatay dinhi sa atong siyudad, ug wa pa'y mga protocols niadtong panahona.

Mga kabataan nga anaa sa bukid nga luwas sa bisa'g unsa nga virus, gidala naman hinuon didto sa dakbayan sa Sugno nga daghang mga tawo? Ug labaw pa gyud sa tanan, walay kalibutan intawon ang mga ginikanan. Naluoy ko sa usa ka inahan nga naghinugilon nga wala na'y pagtagad ug wala na'y gugma ang iyang anak ngadto sa iya, natural na-brainwash sa idolohiya.

Luoy intawon ang mga lumad nga maoy gigamit sa galamay ni Jose Maria Sison kay dili man sila maka-recruit sa mga edukadong mga batan-on dinhi sa patag.

Ang kinibuhi ning mga bataa bililhon alang kanato ug sa ilang mga ginikanan, apan way bili alang kang Sison nga nagpadayon sa iyang pagpakayaman didto sa Oslo Norway. Anong say ninyo?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph