COTABATO CITY -- Personal nga atraso ang gilantaw sa mga awtoridad nga motibo sa pagpamusil sa duha ka estudyante kon diin usa kanila ang nakabsan sa kinabuhi, alas 6:50 sa gabii, Sabado, Pebrero 20, 2021.
Giila ang namatay nga si Fhejie Reballos Jumalon, 23, samtang grabe ang kahimtang ni Ronnel De Ocampo Saco, 22, pulos ulitawo, nagpuyo sa Barangay Sarmiento, Parang, Maguindanao.
Nasayran gikan kang Maguindanao Police Provincial Office Director Colonel Donald Madamba nga gikan sa Cotabato City ang magsilingang estudyante ug pauli na unta sa ilang mga balay.
Apan pag-abot nila sa Barangay Limbo, Sultan Kudarat sa nahisgutang probinsiya kalit lang gitaparan ang ilang gisakyang motorsiklo sa riding in tandem suspects ug gipamusil gamit ang kalibre .45 nga pistola.
Nangatumba ang mga biktima gikan sa ilang motorsiklo ug on the spot nga namatay si Jumalon kinsa naigo sa ulo ug likod samtang nadala ngadto sa Cotabato Regional and Medical Center sa Cotabato City si Saco ug giingong grabe nga kahimtang.
Milusad pa og dugang imbestigasyon ang kapulisan sa Sultan Kudarat Municipal Police Station sa maong krimen. (Edgar E. Fuerzas)