MOKANTIDAD og sobra tunga sa milyon ang shabu, mga bala ug pusil ang nakuha sa posisyon sa duha ka mga gituohang notadong tigpayuhot og ilegal nga druga sa Davao City.
Alas 5:10 sa hapon niadtong Sabado, Pebrero 20, 2021, usa ka hiniusang buy-bust operation ang gihimo sa awtoridad nga gipangunahan sa Regional Special Operations Group-Regional Police Drug Enforcement Unit (RSOG-RPDEU) sa Davao Region pinaagi sa hepe niini, Police Lieutenant Colonel Ronald Lao, kauban sila Police Lieutenant Welquin Enciso ug Police Major Bernie Suaga sa Buhangin Police Station didto sa Purok 3 Looban, Barangay Talomo, Davao City.
Ang RSOG-RPDEU-Davao Region nag-ila sa mga dinakpan nga sila Khozen Villar alyas Cocoy, 32, taga Purok 3 Looban, Barangay Talomo ug Kirk Loren Bagohin, 34, taga Flores Village Bangkal.
Nasikop ang mga suspek human mikubit sa nagtakuban nga poseur buyer hinungdan nga daling gipangposasan.
Usa ka dakong pakite sa gituohang shabu, usa ka cal. 38 revolver, usa ka Magnum 357 ug mga buhing bala ang nakuha gikan kanila.
Kasong pagsupak sa Republic Act (RA) 9165 kun Comprehensive Dangerous Drugs Act of 2002 ug RA 10591 kun Illegal Possession of Firearms and Ammunition ang atubangon sa mga suspek didto sa korte. (Jeepy P. Compio)