TULO ka mga insidente sa paghikog ang natala sa Eastern Visayas sud lang sa usa ka adlaw, usa niini ang misunog sa kaugalingong lawas.
Unang insidente natala sa Barangay Calomotan, Laoang, Northern Samar, alas 9:20 sa buntag, Huwebes, Pebrero 18.
Giila ang namatay nga si Reynold Novio Cerbito, 45, tricycle driver, nagpuyo sa maong lugar.
Si Cerbito gidala sa GB Tan Memorial Hospital.
Base sa inisyal nga imbestigasyon sa kapulisan, ang igsuon niini niadto sa ilang bakante nga yuta mga 200 metros ang gilay-on gikan sa iyang balay.
Naabtan siya sa iyang igsuon nga nagbitay sa punoan sa Catmon diin migamit kini og pisi nga gihikot sa sanga.
Ang ikaduhang insidente natala sa Sitio Pasakay, Barangay San Pedro, Tunga, Leyte, alas 11:30 sa buntag sa samang adlaw.
Giila ang namatay nga si Rowena Arizo, 49, way trabaho ug nagpuyo sa maong lugar.
Dugang sa imbestigasyon, ang igsuon nga babaye sa namatay padung unta magpakaon sa ilang baboy.
Iyang nakit-an ang sunog nga lawas niini nga naghigda sa gipauga nga dahon sa saging ug narekober sa kapulisan ang plastic container nga dunay gas ug lighter.
Ang ikatulo nga insidente nahitabo sa Catublian, Hinunangan, Southern Leyte, alas 4:50 sa hapon, Huwebes, Pebrero 18, 2021.
Ang namatay mao si Melchor Claridad, 25, nagpuyo sa samang lugar.
Base sa imbestigasyon sa kapulisan, si Claridad nakig-inom pa sa iyang mga amigo pasado ala 1 sa hapon.
Dako nga kakurat sa inahan, nga iyang nakit-an ang anak sud sa payag nga nagbitay gamit ang pisi. (JKDP)