ANG kanhi bahaon, lapukon ug libaong nga dan sa J.M. Ceniza sa Sitio Superior, Barangay Looc, gikonkreto karon ug aduna nay tarong nga drainage system.
Nagahin ang kagamhanan sa dakbayan sa Mandaue og P34,112,590 aron mapatuman kini nga proyekto tungod kay usa kini sa mga priority nga proyekto ni Mandaue City Mayor Jonas Cortes.
Si Atty. John Eddu Ibañez, executive secretary ni Cortes, miingon nga sa wala pa kini makonkreto, kini nga dalan kanunay gibahaan bisan og dili mag-ulan ug usa kini sa dakong problema sa mga residente sa Sitio Superior.
Human kini makonkreto, sigon ni Ibañez nga nakadawat sila og positibo nga feedback gikan sa mga residente.
Matod sa residente, sukad nahuman ang maong proyekto, kon mag-ulan, wala na sila’y problema bahin sa pagbaha sa ilang sitio.
Giasoy ni Ibañez nga gawas sa pagkongkreto sa mga dalan, aduna na kini tarong nga drainage system ug dili na magpundo ang tubig sa ilang dalan hinungdan sa pagbaha.
Matod sab ni Ibañez, ang pagsemento sa dalan makatabang sab kon adunay emergency sa lugar makadalidali na og agi ang mga pang emergency nga sakyanan.
Gawas niini, ang maong dalan mamahimo sab nga solusyon sa huot nga dagan sa trapiko sa D.M. Cortes St.
Sigon ni Ibañez nga himuon na unya ni ang J.M. Ceniza St. nga access road alang public utility jeepney (PUJ) paingon sa Lapu-Lapu City.
Gawas sa maong karsada, gisemento sab ang dalan Jose L. Briones, ang dalan kilid sa Mandaue City Hospital paingon sa Ouano Wharf.
Susama sa J.M. Ceniza St., lapukon ug libaong ang maong dalan hinungdan nga gipasemento sab kini.
Natapos kini niadtong Oktubre 30, 2020 ug ang dakbayan naggahin og P16,048,290 aron mahuman kini. (KFD)