MOABOT sa usa ka libo ka mga kahoy nga bakhaw ang gipangtanom sa katunggan sa Barangay Inoburan, dakbayan sa Naga kagahapon sa buntag, Pebrero 21.
Usa kini sa mga kalihokan sa bag-ong ningsulod sa Eagles Fraternal Order sa Sugbo ubos sa Cebu United Eagles Club.
Si Joseph Vesgara, presidente sa Cebu United Eagles Club sa Sugbo, nagkanayon nga dili lang kini ang gibuhat sa organisasyon sa paghatag og tabang sa pagpanalipod ug pagpalambo sa kinaiyahan, lakip usab ang pagtabang mismo sa katawhan nga nanginahanglan nga maoy tumong gyud sa grupo.
Ang pagpananom og bakhaw gihimo sa Inoburan sa Naga nga dunay nagdumala nga usa ka non-government organization (NGO) sa pagseguro nga maatiman ang pagtubo sa mga bakhaw.
Kini nga kalihokan gisuportahan usab sa lokal nga kagamhanan sa Naga.
Ang bakhawan, gawas nga manalipod sa dapit panahon sa tingbalod, kini ang paborito nga itloganan sa mga isda.
Gawas sa pagpananom og mga bakhaw, ang grupo nihimo usab og feeding ngadto na 50 ka mga bata sa lugar nga gipakaon og lugaw human sa pagpananom sa grupo. (BBT)