13 ka bata gidala sa Davao

MISAKAY SA ABYON: Ang 13 ka mga bata nga lumad gipasakay sa flight 5J-593 sa Cebu Pacific padulong sa dakbayan sa
Davao kagahapon sa alas 6:30 sa gabii, Pebrero 21, gikan sa domestic terminal sa Mactan Cebu International Airport (MCIA). /
HULAGWAY GIKAN SA POLICE REGIONAL OFFICE (PRO) 7
MISAKAY SA ABYON: Ang 13 ka mga bata nga lumad gipasakay sa flight 5J-593 sa Cebu Pacific padulong sa dakbayan sa Davao kagahapon sa alas 6:30 sa gabii, Pebrero 21, gikan sa domestic terminal sa Mactan Cebu International Airport (MCIA). / HULAGWAY GIKAN SA POLICE REGIONAL OFFICE (PRO) 7

LUWAS nang niabot sa dakbayan sa Davao ang 13 ka mga batang lumad nga sakop sa tribu nga Ata Manobo sakay sa flight 5J-593 sa Cebu Pacific gikan sa Mactan Cebu International Airport (MCIA), alas 6:30 kagabii, Dominggo, Pebrero 21.

Kauban sa pagsakay sa samang abyon mao ang unom ka mga ginikanan ug ang mga ginikanan sa laing pito ka mga bata ningsugat lang sa Francisco Bangoy International Airport sa Davao.

Si Police Colonel Robert Limbawan, hepe sa Regional Intelligence Division sa Police Regional Office (PRO) 7, nibutyag nga ang pagdala sa mga bata ug sa mga ginikanan niini giubanan sa mga opisyal sa Women and Children Protection Center Visayas Field Unit.

Uban usab sa mga lumad mao ang municipal social welfare officer sa lungsod sa Talaingod sa Davao del Norte nga si Lorena Bangoy.

“Lipay sila, Sir, kay mao pa ni sila nakasakay sa eroplano, naa pud diri ang ginikanan aning pito misugat sad sila,” matod ni Bangoy sa pakighinabi sa telepono sa Superbalita Cebu.

Sa wala pa makalarga ang mga bata, ang Children’s Legal Bureau (CLB) pinaagi ni Atty. King Perez ug ang Save Our School Network nisuway sa pagbabag pinaagi sa pakig-alayon sa tagdumala sa airline.

Ilang gibutyag nga sa 13 ka menor de edad, pito niini ang walay kauban nga ginikanan nga naghatag og pagtugot lakip na sa korte nga makalarga sila paingon sa Mindanao.

Apan si Limbawan miklaro nga bakak ang gibutyag sa maong grupo nga wala motugot ang mga ginikanan sa pito gani gisugat kini nila sa tugpahanan sa Davao.

“Nanduon sa Davao yung parents ng seven minors, nag-antay sa kanila sa airport mayroon pa ngang tarpaulin wini-welcome yung mga anak nila..” matod ni Limbawan.

Dugang ni Limbawan nga kon nagtinguha ang CLB ug ang SOSN nga mopasaka'g kaso, andam kining atubangon sa korte.

Usa ka semana na ang nakalabay, nahimong kontrobersyal ang gihimong rescue operation sa PRO 7 uban sa DSWD 7, Municipal Social Worker Services sa Talaingod ug City Social Welfare and Services sa siyudad sa Sugbo didto sa retreat house sulod sa University of San Carlos - Talamban Campus (USC-TC) human gikuwestyon sa SOSN ang maong kalihukan.

Ilang pasangil nga dili rescue ang gihimo sa kapulisan sigon sa ilang nakita sa video sa social media sanglit usa kini ka pagpangronda.

Gihimakak usab sa SOSN ug ni Father Rogelio Bag-a, SVD nga walay pagtugot sa mga ginikanan ang pag-anhi sa Sugbo sa 19 ka mga batang Ata Manobo nga nagtungha sa Salugpoangan Ta Tano Igkanugon.

Matod pa, silay ikapamatuod nga naghatag og pagtugot ang mga ginikanan sa ilang paglarga.

Una nang mipasangil ang unom ka mga ginikanan nga ang pananghid sa maestro nga ginganlan og 'Ariel' nga sa Davao motungha ang mga bata dungan sa pasalig nga matag buwan moduaw kini sa ilang barangay sa Talaingod

“The seven Lumad students whose parents sought the assistance of Children’s Legal Bureau (CLB) were transported without consent from their parents and proper coordination by authorities... CLB is closely monitoring the movement of the students involved..” tipik sa pamahayag sa CLB nga gikutlo sa Superbalita Cebu.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph