Usa sa dili nako makalimtan nga coverage kon maghisgut ta og isyu sa trapiko mao kadtong mga panahon nga ang Banilad ug Talamban area nga naila sa pangalan nga BanTal, ang init nga gidebatihan. Ang tawo nga gitahasan nga nagpasingot didto mao si Konsehal Jack Jakosalem nga naila sa pangalan nga Jack the Wack sa iyang fans sa dyIO. Isip chairman sa CITOM nga karon gitawag og Cebu City Transportation Office kun CCTO, gipaningkamotan ni Konsehal Jack ang pagsulbad sa maong isyu.
Ang akong tahas mao ang pagpahibalo sa publiko pinaagi sa pag-interview kang Konsehal Jack kon may epekto ang giduso nga paagi pagpakalma sa kahuot sa bul-og sa trapiko. Isip pangulo sa CITOM, mainampingon niya nga gituman ang iyang tahas. Ang iyang pagka maabiabihon sa mga sakop sa media, usa sa epektibong hinagiban pagpadangat sa iyang mensahe ngadto sa mga driver sa mga angay buhaton pagpaluag sa nagka gidlay nga trapiko.
Samtang na-busy siya pagdumala sa trapiko, nahibulong ko sa kalit niyang pagbutho sa Cebu City Medical Center. Niadtong higayona nag-cover ko sa usa ka zoo keeper sa Cebu City Zoo nga gipaak og King Cobra. Si Ronron Aventurado nga nag-duty niadtong higayona, nakadakop og cobra duol sa gate sa zoo. Way nasayod diin gikan ang cobra sanglit wa man mamuhi og cobra ang zoo.
Isip zoo keeper, kinahanglan nga madakop niya kini paglikay nga kini makapaak o makahasol sa mga mananap sa zoo. Iyang nadakpan. Apan sa wala pa ni niya masud sa hawla napaakan ang iyang bukton. Tungod sa ka la sa cobra, nanghubag ang iyang lawas ug naglisod siya sa pagginhawa. Natubag ang akong pangutana nganong niabot si Konsehal Jack sa tambalanan. Siya diay ang tuyo ni Konsehal Jack.
Tungod sa dinaliang panginahanglan sa anti-venom, niadto si Konsehal Jack sa tambalanan ug pinaagi sa iyang connection sa mga piloto, iyang natawgan si anhing Capt. Bajenteng aron ipakuha ang anti-venom nga niadtong panahona ang Camiguin Provincial Hospital ang duna. Nilupad si Capt. Bajenteng padung sa Camiguin ug sa iyang pagbalik, dala na ang anti-venom nga maoy nakaluwas ni Ronron.
Si Konsehal Jack nga akong na-interview, igo nalang sa pagpahiyom sa talagsaon niyang labok nga akong gidayeg sa kahanginan.
* * *
Sa mga lumad nga taga Dumingag, Zamboanga del Sur nga nia na sa Sugbo manimuyo, dunay ipahigayon nga reunion alang ninyong tanan. Gitakda ni karong petsa 20 ug 21 sa sunod bulan. Gipahaum ni sa piyesta sa Dumingag karong Marso 18 ug 19. Tungod sa pandemiya, ang reunion maoy magsilbing paagi nga ilang masaulog ang kapistahan ni Senyor San Jose bisan kon nia ra sila sa Sugbo.
Matod ni Dozyl Campomanes dela Peña, usa sa mga opisyal sa Department of Interior and Local Government (DILG) dinhi sa Sugbo, apil nga ilang gikasabot mao si Brig. Gen. Mafe Bazar, ang deputy regional director for administration sa Police Regional Office (PRO) 7, lumad nga taga Dumingag.