TUNGOD sa nagsakang mga kaso sa coronavirus disease sa Dakbayan sa Lapu-Lapu, si Mayor Junard “Ahong” Chan nidili sa pagpahigayon sa contact sports, operasyon sa internet café, sabong sa lisensyadong mga buwangan ug gibalik ang liquor ban.
Sa iyang Executive Order No. 2021-010, si Chan niingon nga gikinahanglan kaayo kini taliwa sa nagsige og saka nga mga kaso sa Covid-19.
Ang iyang kamandoan niepekto sugod sa alas 12 sa kaadlawon sa Pebrero 20, 2021 ngadto sa alas 12 sa kaadlawon sa Pebrero 27, 2021.
Gidili usab ang mga panagtapok sama sa zumba, group exercise, birthday parties, general assemblies, mga conference nga dunay kalabutan sa trabaho, trainings ug uban pang mga kalihukan diin magtapok ang mga tawo.
Sa liquor ban, gidid-an ang si bisan kinsa sa pagpamaligya, bisan niadtong dunay permit sa pagbaligya og mga ilimnong makahubog.
Bisan gani ang pag-inom sa publiko ug pribadong mga lugar gidili usab ni Chan.
“The drinking of any type of liquor in public and private places shall be prohibited. Private places shall include garages, roads and common areas in private subdivisions and residences,” matod sa EO sa mayor.
Hingpit usab nga gidili ang videoke ug karaoke bisan sulod sa pribadong pinuy-anan ug lisensyadong mga establisemento. Ang iyang sayo nga EO nga nagtugot sa videoke ug karaoke iyang gilibkas.
Mga establisemento nga gitugtan sa pagdalit og pagkaon ug karaoke gitugtan lang sa pag-serve og pagkaon.
Gibalik usab ni Chan ang pagpatuman sa number coding sa quarantine pass sa mga publiko ug pribadong merkado, supermarkets, apil na niini ang department ug convenience stores.
Sa Lunes, Miyerkules ug Biyernes, ang mga pass nga nagtapos og odd numbers 1, 3, 5, 7 ug 9 maoy gitugtang makapamalit. Sa Martes, Huwebes ug Sabado, ang even numbers nga naglakip sa 0, 2, 4, 6 ug 8 maoy gitugtang makasulod sa mga merkado.
Bisan kinsa nga nag-edad og 15 anyos paubos ug senior citizens nga nag-edad og 65 anyos pataas gidid-an sa pagsulod sa mga kan-anan.
Exempted hinuon sa kamandoan ang mga guest sa mga hotel ug resort.
Mga kan-anan nga gitugtang maka-operate og 24 oras makadawat lang og customer nga dine-in hangtod sa alas 10 sa gabii. Lapas na mag-take out na lang.
Iya usab nga gimandoan ang kapulisan ug force multipliers sa higpit nga pagpatuman sa mga health protocol sama sa pagpasul-ob og face shield ug facemask ug pagseguro nga husto ang pagsul-ob niini. Ang madakpan pahamtangan sa silot tukma sa nalatid ordinansa sa dakbayan.
Gimandoan usab ni Chan ang Business Permit and Licensing Office sa pagsusi sa tanang mga establisemento kon nituman ba sa iyang executive order.
Sa datus sa Department of Health-Central Visayas sa Pebrero 21, 2021, ang Dakbayan sa Lapu-Lapu nitala og 50 ka bag-ong mga kaso nga nihatod sa aktibo ngadto sa 613 ug dunay 28 ka recoveries. (REV)