NUNOT sa paglibkas sa Philippine Atmospheric, Geophysical and Astronomical Services Administration (Pagasa) sa storm signal sa tibuok Sugbo niadtong Pebreo 22, gipapauli na ang liboan ka mga namakwit sa amihanan sa lalawigan sa pagpangandam sa hulga sa bagyog Auring.
Ang nagpabilin sa tropical cyclone wing signal No. 1 mao na lang ang Sorsogon, Masbate, Ticao ug Burias Islands, Albay, Catanduanes, ug eastern portion sa Camarines Sur.
Si Auring niigo sa yuta sa Batag Island, Laoang, Northern Samar sa alas 9:00 sa buntag sa Pebrero 22.
“The disturbance is forecasted to weaken considerably due to significant terrain interaction leading to deterioration into a remnant low within 24 hours or possibly sooner,” sumala sa Pagasa.
Tungod niini, ni-downgrade na usab ang Cebu Provincial Disaster Risk Reduction and Management Office (PDRRMO) sa Blue Alert status
Ang dili mominos 4, 907 ka mga indibidwal o 1, 260 ka mga pamilya ang nakapauli na sa tagsa-tagsa niini ka mga panimalay subay sa paglibkas na sa storm signal, matod ni Rhee Telen, tigpamaba sa PDRRMO.
Gikan sila sa siyam ka mga lokal nga kagamhanan sa lalawigan sa Sugbo sulod sa 33 ka mga barangay.
Mga lugar sama sa Dakbayan sa Danao ug mga lungsod sa Daanbantayan, Bantayan, Tuburan, Poro, Madridejos, San Francisco, Tudela ug Sibonga.
“Ang kining kasagaran nga mga barangays nga namention nga local government units are coastal barangay ug dunay dagko nga sapa o suba,” matod ni Telen,
Base sa impormasyon sa buhatan, walay natala nga dakong kadaot sa mga kalungsoran. Apan sagad sa mga lungsod nakasinati sa pagkatumba sa mga kahoy. Walay naangol sa hitabo.
Pipila usab sa mga lugar sa Probinsya ang miluwat og kamandoan sa temporaryong pag sirado sa agianan sama sa Manipis road sa dakbayan sa Talisay, pag suspenso sa klase sa lungsod sa Madridejos og ang pagpahunong sa mga water activities sa lungsod sa Badian.
Tungod sa maayo na nga kahimtang sa panahon, gilauman nga libkason na usab ug makabalik na ang mga kalihukan sa kalungsoran sa probinsya. (ANV)