Gipaubos sa surprise drug test ang 300 ka mga pulis sa Mandaue City Police Office (MCPO) sa Lunes, Pebrero 22, 2021, isip tipik sa internal cleansing.
Gipangulohan ang surprise drug test sa Crime Laboratory sa Police Regional Office (PRO) 7.
Matod ni Police Colonel Jonathan Abella, director sa MCPO, ang test rekisitos sa matag buhatan sa kapulisan nga 100 posyento sa pulis mapaubos sa drug test matag tuig.
Lakip sab si Abella sa gipaubos sa drug test. Adunay 430 ka mga pulis ang buhatan sa MCPO.
Sigon ni Abella nga 100 ka mga kawani nila gipaubos na sa usa ka surprise drug test sa miaging buwan.
Matod niya nga mapasalamaton siya nga sa miaging drug test, way bisan usa nga nagpositibo.
Dugang ni Abella nga aduna say ubang mga pulis nga gipaubos pa og isolation human magpositibo sa Covid-19, apan human kon maayo sa sakit, ipaubos sab sa surprise drug test.
Kini aron makab-ot sa ilang buhatan ang 100 porsyento nga target, sigon ni Abella.
Sa laing bahin, kon adunay magpositibo sa drug test, matod ni Abella nga ipaubos pa kini og confirmatory test ug kon positibo gihapon, imbestigahon ang pulis.
“It’s up to them to clear their name nganong na involve sila illegal drugs but automatic subject for investigation,” sigon ni Abella.
Ipaagi sab kini sa og due process ug kon mapamatud-an nga nalambigit sa ginadiling drugas, matod sa direktiba nga nadawat nilang Abella gikan ni Philippine National Police Chief Debold Sinas nga i-dismiss sa serbisyo.
Sa pagsuwat ning taho, wa pay nadawat nga resulta sa drug test sila si Abella. (KFD)