Bisan sa padayong pagsaka sa mga coronavirus disease (Covid-19) sa Dakbayan sa Lapu-Lapu, aduna gihapoy lima ka mga barangay nga nagpabiling way aktibong mga kaso.
Aduna usay siyam ka mga barangay nga nagpabiling single digit ang kaso o wa makaabot og 10. Base sa data gikan sa Lapu-Lapu City Health Office nga nakuha ning mantalaan, ang mga barangay nga nagpabiling way kaso mao ang Barangay Talima, Caw-oy, Tungasan, Pangan-an ug Caohagan sa isla sa Olango.
Samtang tag usa lang ka kaso usab ang natala sa Sta. Rosa, Baring, Tingo ug Sabang sa isla gihapon sa Olango.
Wala usab makaabot og double-digit ang mga kaso sa Covid-19 sa Canjulao, Ibo, Punta Engaño, Subabasbas ug San Vicente sa isla sa Olango usab.
Nakatala og labing daghan nga kaso sa dakbayan karon mao ang Basak, 75; Pajo, 65; Gun-ob, 48; Pusok, 47, Mactan ug Marigondon dunay tag 38.
Sa kinatibuk-an, moabot na sa 514 ka aktibong mga kaso ang natala sa dakbayan sa Pebrero 21.