Sa 80 ka mga barangay sa dakbayan sa Sugbo, siyam na lang ang way pagpanakod sa coronavirus disease (Covid)-19 sa milabay nga 10 ka mga adlaw, tanan bukirang mga dapit.
Kini ang gipahibawo ni City Councilor Joel Garganera, deputy chief implementer sa Emergency Operations Center (EOC).
Si Garganera nagkanayon nga wala una nila ibutyag ang mga ngalan sa siyam ka mga barangay aron di mokompyansa ang mga opisyal ug residente.
Sa ingon magpadayon sa ilang gimbuhaton ang mga lumolupyo aron mabatokan ang pagkatap sa virus.
Sukad sa pagsugod sa pandemic, ang Barangay Paril ug Tabunan ang nagpabilin nga virus free sa mga barangay sa siyudad sanglit ang 78, aduna nay natalang mga kaso.
Si Garganera niawhag sa katawhan nga pabilin nga magmabinantayon ug sama sa naandan tahuron ang minimum health protocol sanglit kon di masunod, dako ang kahigayunan sa pagpanakod.
Niadtong Pebrero 21, ang EOC nitala og 255 ka bag-ong kaso samtang adunay 108 ka individual ang naalim.
Sa kinatibuk-an, niabot na og 16,282 ka mga kaso sa Covid-19 sa Dakbayan. Ang 3,142 niini padayon pa nga nagpaalim sa quarantine facility, hospital, barangay isolation center ug hotels ug pension houses.
Niabot na og 722 ka mga kinabuhi ang nakalas gumikan sa Covid-19. (PAC)