GIISBOG ngadto sa Marso 1 gikan sa Pebrero 15 ang re-opening sa mga sinehan sa Pilipinas. Ambot kon di ba kaha ni ma-postpone na sad.
Ang gikahadlokan sa mga health expert kay mas dali kuno mokatap ang virus sa mga sirado nga lugar sama aning mga sinehan.
Pero ngano man lagi sa ubang mga nasud sama sa Japan, Sweden, Spain ug America hagbay ra man silang nag-abli?
Mas luwas pa man gani tingali ang mga sinehan kumparar sa mga pampublikong sakyanan nga plastic shield ray giali sa mga nagsikitsikit nilang mga pasahero.
Mas maayong ablihan na ang mga sinehan kay luoy na kaayo ang entertainment industry nga mag-usa na ka tuig nga wa nay kita.
HEALTH STANDARDS
Pila ra man sad kabuok ang manan-aw og sine bisan niadtong wala pay Covid maihap ra man. Mapuno ra man ni kon nindot gyud ang salida.
Sama aning pinaka-bag-ong James Bond movie ni Daniel Craig nga “No Time To Die” nga usa sad ko sa nag-atang.
Last year pa unta ni pero na-postpone tungod sa Covid pero karon ipasalida na gyud sa Oktubre 8, 2021.
Ang balik-tambalang John Lloyd Cruz ug Bea Alonzo sa Star Cinema mahitabo sad karong tuiga. Di mo ma-excite ana? Maayo na lang ba makalimot ta bisag kadiyot sa atong mga problema.
Basta mosunod lang gud ta sa ilang health standards, sama sa two seats apart, disinfect pirme sa mga sinehan kada human sa salida, mag-face mask ug face shield ug no eating and talking.
MISS UNIVERSE
Usa ka reliable source ang nitug-an nako nga kon way mga kausaban ang 69th edition sa Miss Universe pageant himuon sa Mayo 9, 2021 sa adlawng Dominggo atol sa Mother’s Day.
Aduna say mga kausaban nga mahitabo karong tuiga sa format sa Miss U lakip na sa ilang preliminary selection.
Gipaabot nga mo-isyu og pormal nga pamahayag ang Miss Universe Organization kalabot niini.
NIBAHAR NA?
Nag-trending ang guesting ni Presidential Spokesperson Harry Roque sa Eat Bulaga segment nga “Bawal Judgmental” niadtong Sabado.
Apan sagad sa mga comment mga negatibo. Bisan kanang mobasa ko sa mga comment sa social media bahin sa administrasyon ni Duterte daghan na kaayong negative. Timaan kaha ni nga nibahar na ang popularidad sa presidente?