DAGHAN mi og nadunggan nga mga reklamo sa mga nadestino diha sa mga isolation ug quarantine center sa Syudad sa Sugbo. Di man kita arte pero lahi na sab nga ang mataptan og Covid-19 ibutang sa mga lugar nga hugaw ug baho.
Mao nga, kon di man mahimo nga mag-home quarantine, adto na lang sa usa ka hotel mag-isolate ang usa nako ka igsuon nga napositibo.
Kon tarong paggamit ang binilyon nga budget sa syudad batok sa Covid-19, mas arang-arang unta ang mga isolation ug quarantine center sa syudad. Apan, sukwahi man ang nasinati-an sa katawhang napositibo.
Conscious man unta kaayo kining atong administrasyon sa Syudad sa Sugbo nga di madaot sa mata sa katawhan kay eleksyon na baya Mayo sunod tuig. Karong Oktubre na ang filing sa COC kun certificate of candidacy.
Sa pagkakaron hinuon kay nalingaw pa ang mga Sugboanon sa away nilang Mayor Edgar Labella ug Bise Mayor Mike Rama.
Mahibong lang sab ko nganong moinsister si Mayor Labella nga mag-work at home nga klarong masakiton man ang iyang nawong nga makita sa video inig press conference. Di sab ko mahibong nganong mokwestyon niini ang kampo sa bise mayor.
Ang nakapaet lang gyud kay samtang nag-intramurals ang duha, nagkasaka ang mga kaso sa Covid-19 sa Syudad sa Sugbo.
Samtang maka-afford sa gastuhan ang mga sama nilang Arsobispo Jose Palma ug kanhi mayor Alvin Garcia, di ra ba gyud ingon nila ang kahimtang sa bagang duot sa mga nag-positibo.
Nag-anam-anam na og post sa Facebook ang mga apektado. Wa ra bay pili. Parehong ang mga sentro nga giateman sa kampo ni Labella ug Rama walay mga ayo. Hugaw ug baho, matod pa.
Hinuon, malingaw ko sa ubang mga reaksyon sa mga tigsuporta sa politika kay ingnon dayon nga mga tigsuporta sa BOPK. Apan dili inimbento ang ilang mga reklamo. Sila mismong mga nagkabangi nga lider sa Partido Barug ug PDP-Laban sa Syudad sa Sugbo nakahibawo niini.
Lain pa gyud kining kahimtang sa pagbakuna. Samtang makapabalaka ang nagmika nga pagpalit og supply sa nasudnong administrasyon, naa man say paglihok didto.