SUPERBALITA CEBU

Editoryal: Gobyerno ray mabasol

Editorial Cartoon by Ariel Itumay

NAKAULI na ang 13 ka mga bata nga Ata Manobo sa Mindanao sa Dominggo sa gabii luwan sa usa ka abyon gikan sa Sugbo nga nitugpa sa Davao City. Ang mga bata ug ilang mga ginikanan nasugba sa kontrobersiya human sa usa ka “rescue operation” nga gilusad sa Department of Social Welfare and Development (DSWD) inabagan sa kapulisan.

Ang isyu sa kahimtang sa edukasyon sa mga Lumad sa Mindanao mibuto taliwa sa engkwentro tali sa militar ug mga rebeldeng New People’s Army (NPA). Nagpasanginlanay ang duha ka mga kampo nga maoy nakamugna og kagubot sa mga komunidad sa mga Lumad.

Apan di unta moabot sa punto nga ang mga bata madala og mga organisasyon nga giakusahan nga may kalabotan sa mga rebeldeng NPA kon ang ubang mga ahensya sa kagamhanan, sama sa Department of Education (DepEd) ug ubang mga buhatan naghimo sa diniyos sa ilang tahas.

Kasagaran sa mga Lumad kabos ug kuwang o wa gani edukasyon. Ang mga ginikanan naglantaw nga mahaw-as sa kalisod ang ilang mga anak pinaagi sa pag-edukar kanila. Kay way kagamhanan nga nagtagad, sila nitugot sa mga organisasyon sa pag-edukar sa ilang kabataan.

Mahimo ra unta nga dad-on ang mga bata sa mga tunghaan nga iya sa kagamhanan sa ilang lokalidad ug hatagan og espesyal nga pagtagad sibo sa ilang nabatasan ug kultura aron malikay sa diskriminasyon.

Abagan sila sa local government unit (LGU) aron madugangan kon dunay kuwang sa pundo alang kanila. Apan makita ang kakuwangan sa kagamhanan sa paghimo sa ilang tahas kay naabot ang mga bata nga Lumad dinhi sa Sugbo. Tiaw mo na, 2018 pa diay sila diri. Kon tinuod man nga dunay pipila ka personalidad nga nagpaluyo sa kabataan nga dunay relasyon sa mga NPA, kinsa ra man usab ang mabasol? Ang kagamhanan, kay kuwang o wa sila magpakabana sa kahimtang sa mga Lumad.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!