LAYO pa gani ang eleksiyon apan may indikasyon na nga mabulukon ug kulbahinam kini.
Sa kaulohan, nag-iyahay na'g patutsada ang posibleng modagan sa pinakataas nga puwesto nga mopuli kang Presidente Rody Duterte. Mahuman ang iyang unom ka tuig nga termino sa Hunyo 30, 2022 ug magsugod na ang filing of candidacy pagka-senador, bise-presidente ug presidente sa Oktubre 2021.
Pipila ka bulan na lang kay madungog na usab nato ang daguok sa bugnong lugaynon nga kinaham sa mga Pinoy. Naa poy nag-ingon nga di madayon ang eleksiyon sunod tuig kay modeklara na daw si PRody og "Revolutionary Government" diin wagtangon ang duha ka balay balauranan sama sa gibuhat kanhi ni Presidente Ferdinand Marcos sa pagdeklara niya og Martial Law. Apan kung madayon ang eleksiyon, may mga pangalan na kitang nadunggan nga interesado.
Siyempre dili magpalupig ang Liberal Party nila ni kanhi Presidente Pinoy ug Senador Mar Roxas ug ang ilang manok kay si Vice President Leni Robredo. Posible sab nga ang iyang bise mao si Roxas o si Senador Franklin Drilon.
Ang Nationalista Party-KBL aduna nay manok nga si kanhi Senador Bongbong Marcos ug posible mag-bise presidente si Congressman Allan Peter Cayetano.
Ang Nationalist People's Coalition ni kanhi ambassador Danding Cojuanco posibleng mopadagan sa negusyante nga si Ramon Ang. Wa pay klaro ang Partido Demoratiko Pilipino-Laban kay dakong posibilidad nga padaganon niini si Senador Manny Pacquiao nga mao na karon ang presidente sa PDP-Laban human moluwat sa katungdanan si Senador Koko Pimentel.
May posibilidad nga modagan si Pimentel isip bise-presidente o kaha si Senador Lawrence "Bong" Go. Gawas kung modagan pagka-presidente si Mayor Inday Sara Duterte-Carpio ubos sa PDP-Laban, hayan nga mag-bise presidente si Pacquiao kung mosugot sab si Pacquiao kay sakop man si Inday Sara sa Hugpong ng Pagbabago.
Apan para kanako, mora'g dili mosulod si Inday Sara sa PDP-Laban kay sayod baya kita sa iyang batasan nga dili niya iluklok ang iyang kaugalingon sa mga grupo nga gipundar sa iyang amahan. Sa paglingkod niya pagka-Mayor sa Davao iyang gitukod ang "Inday Sara Para sa Barangay" inay nga iyang gamiton ang makinarya sa Hugpong sa Tawong Lungsod sa iyang amahan.
Sa niaging eleksiyon, iyang gitukod ang Hugpong ng Pagbabago (HNP) apan regional political party lang kini ug dili pang-nasyonal busa nangutana ang kadaghanan kung unsang partido ang iyang sakyan kung tinuod man nga modagan siya pagka-presidente. Busa daghang grupo nga nagpaskin sa ilang hagit nga "Run Sara, Run" kay hangtud karon gihimakak niya nga modagan siya. Wala say lakang nga himuong national party ang HNP kay seguradong maputos siya sa tirada ug batikos kung sayo siyang modeklara sa iyang kandidatura.
Sa laing bahin among ipadangat ang among kasubo sa sakop sa ilang banay sa pagkamatay sa PDP-Davao Council President-elect nga si Conrad Sillada niadtong Pebrero 19.
Dako sab namong kasubo sa pagkamatay ni Demie "Totong" Diaz Calceña, kanhi Treasurer sa PDP-Davao niadtong Pebrero 6. Daghan pa unta silang plano nga buhaton sa pagpalambo sa partido apan nabalda tungod sa pandemya sa Covid-19.
Panaw sa bai Conrad ug Demie.