GIKAN sa birthday party ang biktimang 15 anyos dihang giingong gitabangan og lugos sa iyang lima ka mga barkadang batan-on, Pebrero 17, 2021 sa usa ka barangay sa Toril, Davao City.
Sa paspas nga follow-up operation sa Toril Police Station sa panguna sa hepe nga si Police Major Michael Uyanguren ug sa Women and Children's Protection Desk (WCPD) ning istasyon, nasikop ang lima ka batan-on kinsa anaa na sa hamtong ang mga pangedaron.
Nasayran nga natingala ang maguwang sa biktima nganong naghilak kini ug dunay gusto isulti kaniya.
Dihang nahibal-an sa maguwang ang hitabo, mitug-an sab kini sa amahan ug gilayon silang nagpatabang sa WCPD sa Toril police.
Ang biktima nagsaysay nga samtang pauli na unta siya gikan sa birthday party, kalit siyang gibira sa usa sa mga suspek sud sa usa ka kuwarto sa balay sa ilang higala, taud-taod, gialirongan sa lima ug gitabangan ug gipuli-pulihan og panamastamas.
Human sa hitabo, daling nanibat ang lima ka batan-on samtang naghilak nga miuli ang biktima sa ilang balay.
Nagpatabang sab sa pulis ang pamilya sa biktima alang sa ilang proteksiyon sanglit giingon nga dunay naga-adto ug nagabahis-bahis sa ilaha nga mga lalaki.
Pebrero 19, 2021 gikasohan ang lima ka dinakpan og kalapasan sa Republic Act 8353 (RA) in relation to RA 7610 didto sa City Prosecutor's Office.